په نورستان ولايت کې ځايي سرچينې وايي چې د برگ مټال ولسوالۍ پر کان کیندونکو د غره د ښوئېدو په پېښه کې درې تنه مړه شوي او دوه نور ټپيان دي.
د سرچينو په وینا، دا پېښه د پنجشنبې په ماښام (د زمري په لومړۍ) د برگ مټال ولسوالۍ په «پچيګرام» سيمه کې رامنځته شوې ده. له دغو کانونو څخه د بېروج، کونزايټ او مارګانيټ په ګډون بېلابېلې قيمتي ډبرې استخراجېږي.
سرچينو زياته کړې چې د دغې پېښې قربانيان او ټپيان د برگ مټال ولسوالۍ اوسېدونکي دي.
د سرچينو په وینا، ټپيان د درملنې په موخه روغتيايي مرکز ته لېږدول شوي، خو د هغوی د روغتيايي حالت په اړه نور جزئيات نه دي ورکړل شوي.
په نورستان کې د طالبانو سيمه ييزو چارواکو تر اوسه د دغې پېښې په اړه څه نه دي ويلي.
په افغانستان کې د کانونو دا ډول پېښې وخت په وخت د کارګرانو ژوند اخلي.
غیر مسلکي او ناخوندي کیندنې، او همدارنګه د کارګرانو لپاره د خوندیتوب د اسانتیاوو نه شتون د داسې وژونکو پېښو مهم لاملونه ګڼل کېږي.
لیکواله:سلیمه آریایي
