عیني شاهدانو رسنیو ته ویلي چې د سېشنبې ورځې د هرات د لاریونونو پر مهال د طالبانو د ځواکونو شمېر د اعتراض کوونکو له شمېر څخه ډېر و.
د شاهدانو په خبره، طالبانو د لاریون کوونکو د خورولو لپاره پر خلکو ډزې کړي او د زور او تاوتریخوالي په کارولو سره یې اعتراضي غونډې پای ته رسولي دي. ځايي سرچینو هم د لاریون کوونکو پر وړاندې د طالبانو د سخت چلند خبر ورکړی دی.
له پېښې ځایه ترلاسه شوي انځورونه هم د پرلهپسې ډزو غږونه او د معترضینو ترمنځ د طالبانو د ځواکونو پراخ حضور ښيي. د شاهدانو په وینا، د دغو ډزو له امله یو شمېر ښاریان ټپیان شوي او د یوه ټپي حالت «ډېر اندېښمنوونکی» بلل شوی دی.
په ورته وخت کې، د هرات یو شمېر اوسېدونکو د اعلامیو په خپرولو سره د جمعې له لمانځه وروسته د بلې اعتراضي غونډې د جوړولو غوښتنه کړې ده.
د طالبانو ادارې تر اوسه د دغو اعتراضونو او د معترضینو سره د چلند په اړه خپرو شويو راپورونو ته په رسمي ډول غبرګون نه دی ښودلی.
لیکواله:سلیمه آریایي
