په بدخشان ولایت کې سیمهییزې سرچینې وایي، د طالبانو ناراضي قوماندان جمعهخان فاتح، چې د نسي ولسوالۍ اوسېدونکی دی، له څه مودې کابل کې تر پاتې کېدو وروسته بېرته خپلې سیمې ته ستون شوی دی. نوموړی په داسې مهال بدخشان ته راستون شوی چې په زېباک ولسوالۍ کې د طالبانو او د افغانستان د ازادۍ جبهې ترمنځ نښتې روانې دي.
د سرچینو په وینا، جمعهخان فاتح د بدخشان د ډلهییزو نارضایتيو له زیاتېدو وروسته کابل ته غوښتل شوی و. ویل کېږي، د طالبانو د پوځ لوی درستیز فصیحالدین فطرت او د اقتصاد وزیر دینمحمد حنیف د هغه د کابل سفر په منځګړیتوب کې رول درلود.
جمعهخان فاتح تر دې وړاندې د طالبانو د مشرتابه له ځینو کړنو ناخوښي ښودلې وه او د زابل ولایت د مرستیال له دندې یې استعفا کړې وه. خو وروسته یې، کابل ته له سفر وروسته، له مشرتابه سره خپل اختلافونه «رسنیز تبلیغات» بللي وو.
بلخوا، بدخشان په وروستیو اونیو کې د امنیتي پېښو شاهد هم پاتې شوی دی. د سپاهیان میهن ډلې تر دې وړاندې د یفتل پایین ولسوالۍ د څو ساعتونو لپاره نیولې وه، چې د دغه ولایت امنیتي وضعیت یې لا حساس کړی دی.
کتونکي وایي، په زېباک کې د نښتو دوام، د یفتل پایین وروستي پرمختګونه او د طالبانو د داخلي اختلافونو زیاتېدل ښيي چې د بدخشان امنیتي وضعیت لا هم پېچلی او د اندېښنې وړ دی.
لیکوال:سعید سمیر
