د هرات ولایت څخه سرچینې وایي، طالبانو د چهارشنبې په سهار د ښار په یو شمېر ښوونځیو کې د ښوونکو موبایلونه پلټلي او د هغوی د ټولنیزو رسنیو فعالیتونه یې څارلي دي.
د سرچینو په وینا، طالبانو د هرات ښار د رسالت ښوونځي درې ښوونکي د ټولنیزو رسنیو د فعالیتونو د پلټنې وروسته له ځان سره بیولي دي.
سرچینې زیاتوي چې طالبان د هغو مطالبو، پوسټونو او خبرونو د څارنې هڅه کوي چې د دوی پر ضد ګڼل کېږي. د معلوماتو له مخې، په ښوونځیو کې د ښوونکو د ټولنیزو شبکو او د واټساپ ګروپونو فعالیتونه هم تر څار لاندې نیول شوي دي.
بلخوا، د نیمروز یو شمېر اوسېدونکو په خپلو پیغامونو کې ویلي چې طالبانو د تلاشۍ په بېلابېلو پوستو کې د خلکو د موبایلونو پلټنه پراخه کړې او دا لړۍ له پرون راهیسې لا پسې زیاته شوې ده.
تر اوسه طالبانو په دې اړه رسمي څرګندونې نه دي کړي.
لیکوال:سعید سمیر
