د امنیتي کړکېچونو له زیاتېدو سره د طالبانو او پاکستان ترمنځ اړیکې یو ځل بیا نوې مرحلې ته دننه شوي دي. د طالبانو ویاند ذبیحالله مجاهد د چهارشنبې په ورځ، د غبرګولي ۲۰مه، ادعا وکړه چې د پاکستان پوځ د تېرې شپې په هوايي بریدونو کې د کونړ، خوست او پکتیکا ولایتونو په ځینو سیمو کې لږ تر لږه ۱۳ کسان وژل شوي او ۱۴ نور ټپیان شوي دي.
مجاهد په ایکس کې په یوه پیغام کې وویل چې په وژل شویو کسانو کې ۱۱ ماشومان، یوه ښځه او یو سپینږیری سړی شامل دي. د هغه په وینا، یو شمېر نورې ښځې او ماشومان هم په دغو بریدونو کې ټپیان شوي دي.
د طالبانو ویاند همدارنګه د پاکستان پوځ تورن کړ چې د ملکي وګړو کورونه یې په نښه کړي دي. هغه دغه بریدونه «جنایت» وبلل او د عاملینو د حساب ورکولو غوښتنه یې وکړه.
تر اوسه د پاکستان حکومت د دغو ادعاوو په اړه کوم غبرګون نه دی ښودلی او نه یې د بریدونو د ترسره کېدو یا د هغوی د احتمالي موخو په اړه څه تأیید یا رد کړي دي.
دا پېښه په داسې حال کې رامنځته شوې چې په وروستیو میاشتو کې د طالبانو او پاکستان اړیکې له زیاتېدونکو کړکېچونو سره مخامخ شوي دي. د دواړو لورو ترمنځ د اختلاف تر ټولو مهمه موضوع د پاکستان ضد وسلهوالو ډلو، په ځانګړي ډول د تحریک طالبان پاکستان، د فعالیتونو مسئله بلل کېږي.
پاکستاني چارواکو څو ځله طالبان تورن کړي چې د تحریک طالبان پاکستان او ځینو نورو وسلهوالو ډلو غړو ته یې اجازه ورکړې چې د افغانستان خاوره د خوندي پناهځای او د پاکستان پر ضد د بریدونو د پلان جوړولو لپاره وکاروي.
اسلامآباد باور لري چې پر خپلو امنیتي ځواکونو د ډېرو مرګونو بریدونو پلانونه د افغانستان له خاورې څخه جوړېږي او تنظیمېږي.
په مقابل کې، طالبانو دا تورونه رد کړي او ټینګار یې کړی چې هېچا ته اجازه نه ورکوي څو د افغانستان خاوره د نورو هېوادونو پر ضد وکاروي. د طالبانو چارواکو همدارنګه د پاکستان ناامني د هغه هېواد داخلي ستونزه بللې او د حل لپاره یې د اسلامآباد پر امنیتي تګلارو ټینګار کړی دی.
د دواړو خواوو اختلافات یوازې د تحریک طالبان پاکستان تر موضوع پورې محدود نه دي. د طالبانو له بیا واکمنېدو راهیسې، د ډیورنډ کرښې مسئله، سرحدي نښتې، د پولې په اوږدو کې د امنیتي تاسیساتو جوړول،د پولې هاخوا بریدونه او له پاکستانه د افغان کډوالو پراخ ایستل هم د کابل او اسلامآباد اړیکې څو ځله له ستونزو سره مخ کړې دي.
د طالبانو له لوري د دغو هوايي بریدونو ادعا په داسې مهال کې مطرح شوې چې تازه د طالبانو او پاکستان چارواکو د چین په منځګړیتوب د ارومچې په ښار کې لیدنې او خبرې کړې وې. سره له دې چې دواړو لورو د خبرو اترو پر دوام ټینګار کړی و، خو د امنیتي اختلافاتو د اصلي موضوع په اړه د کومې موافقې نښې ونه لیدل شوې.
د چین د بهرنیو چارو وزارت د دغې غونډې له پای ته رسېدو وروسته د سیمې د ثبات او امنیت د ساتنې لپاره د خبرو اترو او ګډو همکاریو پر دوام ټینګار کړی و.
خو له دغو مذاکراتو لږ وخت وروسته د هوايي بریدونو ادعاوې دا څرګندوي چې د طالبانو او پاکستان ترمنځ امنیتي بېباوري لا هم دوام لري، او د سرحدي وسلهوالو ډلو د فعالیتونو پر سر اختلاف د دواړو لورو د اړیکو د ښه کېدو پر وړاندې تر ټولو لوی خنډ ګڼل کېږي.
شنونکي باور لري چې تر هغه وخته چې پاکستان طالبان د تحریک طالبان پاکستان د فعالیتونو د مهار مسؤل وبولي او طالبان دغه تورونه ردوي، د دواړو خواوو اړیکې به لا هم نازکې پاتې وي او د سرحدي نښتو، پوځي عملیاتو او امنیتي کړکېچونو د بیا تکرار احتمال به موجود وي.
لیکواله:سلیمه آریایي
