سرچینې وایي، طالبانو پنځه ورځې مخکې په کابل کې د «د ښځو او ماشومانو د حقونو د څېړنیزې ادارې» پر دفتر، چې مشري یې زرقا یفتلي کوي، چاپه وهلې او د دې ادارې شپږ کارکوونکي یې نیولي او له ځان سره وړي دي.
د سرچینو په وینا، تر اوسه د دغو کسانو د برخلیک په اړه هېڅ معلومات نشته او معلومه نه ده چې هغوی په کوم وضعیت کې دي.
د دې ادارې یوې باخبره سرچینې ویلي، چې طالب ځواکونو د کارکوونکو تر نیولو سربېره، د ادارې وسایل، اسناد او نور کاري تجهیزات هم ضبط کړي دي.
«د ښځو او ماشومانو د حقونو څېړنیزه اداره» د ښځو او ماشومانو د حقونو په برخه کې فعالیت کاوه، او پروګرامونه یې روزنه، دادغوښتنه، څېړنې او د ښځو او ماشومانو د وضعیت په اړه د څېړنیزو راپورونو چمتو کول شامل وو.
د دې ادارې مشره، زرقا یفتلي، د ۱۴۰۴ لمریز کال د جدې په میاشت کې د ۲۰۲۶ کال د «زاید نړیوالې جایزې د انساني ورورولۍ» ګټونکې شوه.
طالبانو تر اوسه د دې راپور او د سرچینو له لوري د شویو ادعاوو په اړه هېڅ غبرګون یا رسمي څرګندونه نه ده کړې.
لیکواله:سلیمه آریایي
