د افغانستان د ښځو د سیاسي مشارکت شبکې یو شمېر غړو د مشهد په ښار کې د یوې اعتراضي غونډې په ترڅ کې په طالبان له خوا په هرات او نورو ولایتونو کې د ښځو او نجونو د وروستیو نیونو پر ضد خپل اعتراض څرګند کړی دی.
اعتراض کوونکو ښځو په افغانستان کې د ښځو د حقونو د وضعیت پر خرابېدو سختې نیوکې کړي او د طالبانو له لوري د ښځو پر وړاندې د محدودیتونو او نیونو لړۍ یې وغندله.
دغو معترضو په ځانګړي ډول د هرات له ښځو او عامو خلکو سره د پیوستون اعلان کړی او له نړیوالې ټولنې او بشري حقونو له بنسټونو یې غوښتنه کړې چې په افغانستان کې د ښځو د خپلسرو نیونو، تاوتریخوالي او د اساسي حقونو د نقض د مخنیوي لپاره جدي اقدامات وکړي.
یوې معترضې ښځې ویلي: «حجاب پلمه ده، هغه څه چې په هرات کې روان دي له افغان ښځو سره ښکاره دښمني ده». بلې ګډونوالې زیاته کړې: «د هرات د ښځو درد زموږ شریک درد دی او موږ نه خاموشه کېږو».
په یوه ویډیويي صحنه کې لیدل کېږي چې دغه مېرمنې د «کار، ازادۍ او زدهکړې» شعارونه ورکوي او د خپلو حقونو غوښتنه کوي.
لیکوال:سعید سمیر
