ځايي سرچینو د نیمروز ولایت په دښتو کې د پنځو افغان وګړو د جسدونو د موندل کېدو خبر ورکړی. د دغو سرچینو په وینا، یادو کسانو هڅه کوله چې د ناقانونه لارو له لارې ایران ته داخل شي، خو د دې سفر پر مهال یې خپل ژوند له لاسه ورکړی دی.
د خپرو شویو معلوماتو له مخې، دغو کسانو د ژوند د غوره فرصتونو او د کار موندلو په موخه د قاچاقي کډوالۍ لارې غوره کړې وې. دا لارې هر کال د افغانستان د لسګونو وګړو ژوند په دښتو، سرحدي سیمو او د کډوالۍ په سختو لارو کې اخلي.
د اقتصادي ستونزو دوام، د بېکارۍ زیاتوالی، د بېوزلۍ پراختیا او شته محدودیتونو یو شمېر افغان وګړي دې ته اړ کړي چې د جدي خطرونو له شتون سره سره، د هېواد پرېښودو لپاره ناقانونه لارې وټاکي؛ داسې پرېکړه چې په ډېرو مواردو کې د غمجنو او مرګونو پېښو لامل ګرځي.
تر دې راپور د خپرېدو پورې، مسؤلو چارواکو د قربانیانو د هویت او د هغوی د مړینې د کره لامل په اړه جزیات نه دي خپاره کړي. همدارنګه، د دې پېښې په اړه څېړنې او پلټنې لا هم روانې دي.
د دغو پنځو افغان وګړو مړینه یو ځل بیا د ناقانونه کډوالۍ خطرونه او له دې پدیدې سره تړلي بشري ستونزې را برسېره کوي؛ هغه موضوع چې د کاري فرصتونو رامنځته کولو، د ژوند د شرایطو د ښه والي او د کډوالۍ لپاره د خوندي او قانوني لارو د برابرولو اړتیا لا نوره هم څرګندوي.
لیکواله:سلیمه آریایی
