په بدخشان ولایت کې د کړکېچونو او نښتو له زیاتېدو سره، د طالبانو یو شمېر بدخشاني غړو د دې ولایت د والي اسماعیل غزنوي د لرې کولو لپاره کمپاین پیل کړی دی. د دې کمپاین ګډونوال وایي چې امانالدین منصور د بدخشان د خلکو ترمنځ د نفوذ او د سیمهییزو شرایطو د ښه پېژندلو له امله، د اوسني وضعیت د مدیریت لپاره تر ټولو مناسب کس دی.
د طالبانو یوه غړي، فاروق بدخشاني، د شنبې په ورځ پر خپلې فېسبوک پاڼې لیکلي چې د هغه څه د مخنیوي لپاره چې نوموړي د بدخشان پر وړاندې د «فرصتطلبو کسانو دسیسې» بللي، اړینه ده چې د دې ولایت د سیمهییز حکومت په رهبرۍ کې بدلونونه راوستل شي. هغه ټینګار کړی چې دا بدلونونه به د وضعیت د ښه مدیریت لامل شي.
هغه همداراز وړاندیز کړی چې امانالدین منصور د بدخشان د والي، عبدالرحمن خادم د امنیه قوماندان، او جمعهخان فاتح د دې ولایت د استخباراتو د رئیس په توګه وټاکل شي. د هغه په وینا، دا کسان د بدخشان له جغرافیې، ټولنیزو شرایطو او د خلکو له کلتور سره د بلدتیا له امله د چارو د سم مدیریت وړتیا لري.
فاروق بدخشاني د طالبانو له رهبرۍ غوښتي چې د بدخشان د کانونو د مدیریت په برخه کې له ډېر دقت څخه کار واخلي او هممهاله بنسټیزې پراختیايي پروژې لومړیتوب وګرځوي. د هغه په باور، دا اقدامات کولی شي مخالفانو ته د شته ستونزو د تبلیغاتي استفادې زمینه محدوده کړي.
په همدې حال کې، د طالبانو یو بل غړي، خبیب خالد، هم امانالدین منصور د بدخشان د والي د څوکۍ لپاره تر ټولو مناسب نوماند بللی او له دې وړاندیز یې، پرته له دې چې نور جزئیات وړاندې کړي، ملاتړ کړی دی.
د دې کمپاین یو شمېر ګډونوال په دې باور دي چې اسماعیل غزنوي د بدخشان د طالبانو په لیکو کې د پام وړ ملاتړ نه لري. د دغو کسانو له ډلې یوه تن، چې نه یې غوښتل نوم یې څرګند شي، افغانستان انټرنشنل ته ویلي چې طالبان به د بدخشاني قوماندانانو له حضور پرته د دې ولایت په اداره او کنټرول کې له لا ډېرو ستونزو سره مخ شي.
یو شمېر نورو ګډونوالو اسماعیل غزنوي د سیمهییزو حساسو موضوعاتو په پارولو او د بدخشان له خلکو سره په ناسم چلند هم تورن کړی دی. دا ادعاوې تر اوسه د خپلواکو سرچینو له خوا نه دي تأیید شوي، او د طالبانو د بدخشان والي هم تر اوسه په دې اړه کوم غبرګون نه دی ښودلی.
د دې کمپاین په دوام، د «فاروقي بدخشاني» په نوم یوه کاروونکي هم په ټولنیزو رسنیو کې لیکلي چې بدخشان په اوسنیو شرایطو کې د امانالدین منصور په څېر مدیر ته اړتیا لري او غوښتنه یې کړې چې نوموړی بېرته په دې ولایت کې د مسؤلیت لپاره وګومارل شي.
لیکواله:سلیمه آریایي
