د افغانستان د ازادۍ جبهې سیاسي مشر، داوود ناجي، په هرات کې د ښځو د نیولو په غبرګون کې ویلي چې د طالبانو د امر بالمعروف او نهی عن المنکر محتسبان لا هم د دې جبهې د بریدونو مشروع هدفونه ګڼل کېږي.
نوموړي له رسنیو سره په خبرو کې ټینګار کړی چې د طالبانو دغه کړنې نه شرعي بنسټ لري او نه هم قانوني حیثیت. د هغه په وینا، د ازادۍ جبهې ځواکونو په تېرو څو میاشتو کې په کابل، کندوز، بغلان او تخار ولایتونو کې د طالبانو محتسبان په نښه کړي او دا ډول عملیات به دوام ولري.
داوود ناجي ویلي چې ازادۍ جبهه د جګړې د قوانینو او بشري حقونو اصولو ته ژمنه ده او د دوی جګړه «ړنده» نه ده. د هغه په خبره، د طالبانو د امر بالمعروف اداره د هغو کړنو او زیانونو له امله چې خلکو ته یې رسوي، یو پوځي هدف بلل کېږي.
هغه زیاته کړې چې د محتسبانو اداره په ځینو مواردو کې د خلکو پر تښتولو لاس پورې کوي او د هغوی چلند نه شرعي جواز لري او نه هم قانوني بنسټ. د نوموړي په وینا، په ډېرو پېښو کې چې ښځې او نجونې نیول کېږي، د هغوی کورنۍ تر ۴۸ ساعتونو پورې د ساتنې د ځای او برخلیک په اړه معلومات نه لري، او طالبان د خوشې کولو په بدل کې له کورنیو پیسې غواړي.
داوود ناجي تر دې وړاندې هم په هرات او کابل کې د طالبانو د پراخو امنیتي تدابیرو، د ټانکونو د ځای پر ځای کولو او د مهمو لارو د تړل کېدو په اړه ویلي وو چې دا اقدامات د ځواک نښه نه، بلکې له خلکو څخه د طالبانو د وېرې څرګندونه کوي.
لیکوال:سعید سمیر
