د طالبانو تر واک لاندې د کډوالو ستونزو ته د رسېدنې عالي کمېسیون ویلي، چې د شنبې په ورځ (د چنګاښ ۲۷مه) ۸۲۹ افغان کډوالې کورنۍ، چې ټول ۴۴۱۵ کسان کېږي، له ایران او پاکستان څخه افغانستان ته ستنې شوي دي.
د کمېسیون د معلوماتو له مخې، راستنېدونکي کډوال د ننګرهار د تورخم، د کندهار د سپین بولدک، د هرات د اسلامکلا او د نیمروز د ورېښمو پله له لارو هېواد ته دننه شوي دي.
د راپور له مخې، له ټولو راستنو شویو کورنیو څخه ۷۱۲ کورنۍ د تورخم، ۷۳ کورنۍ د سپین بولدک، ۴۱ کورنۍ د ورېښمو پله او ۳ کورنۍ د اسلامکلا له لارې افغانستان ته ستنې شوي دي.
کمېسیون ویلي، له راستنو شویو کورنیو سره د اړتیا وړ لومړنۍ مرستې هم ترسره شوي دي.
دا په داسې حال کې ده چې پاکستان د جولای له لسمې وروسته یو ځل بیا د افغان کډوالو د ایستلو بهیر چټک کړی دی. د ملګرو ملتونو د شمېرو له مخې، د جولای تر ۱۱مې پورې یوازې په اوو ورځو کې نږدې ۶۲۰۰ افغانان له پاکستان څخه په جبري ډول افغانستان ته ستانه شوي دي.
د راپورونو له مخې، پاکستان د ۲۰۲۳ کال له پیله تر اوسه شاوخوا ۲.۳ میلیونه افغانان بېرته افغانستان ته ستانه کړي دي. د ملګرو ملتونو د معلوماتو له مخې، لا هم له یو میلیون څخه ډېر افغانان په پاکستان کې ژوند کوي.
پاکستان وایي، د بېاسناده بهرنیانو د ایستلو پالیسي یې د امنیتي اندېښنو او د وسلهوالو بریدونو له زیاتېدو وروسته عملي کړې ده. اسلاماباد ادعا کوي چې ځینې وسلهوال د افغانستان له خاورې فعالیت کوي، هغه ادعا چې د طالبانو حکومت تل رد کړې ده.
لیکوال:سعید سمیر
