ریچارد بنېټ، د ملګرو ملتونو د بشري حقونو ځانګړي راپور ورکوونکي په افغانستان کې، ویلي دي چې د ښځو د نیولو په غبرګون کې هرات کې د پلان شویو اعتراضونو د ترسره کېدو په صورت کې باید ټول لوري زغم او احتیاط وکړي.
هغه ټینګار کړی چې د ملګرو ملتونو کارپوهان د قانوني والي، تناسب او د قانون د پلي کوونکو ځواکونو په اقداماتو کې د تبعیض نه شتون د اصولو پر بشپړ رعایت ټینګار کوي.
دا څرګندونې په داسې حال کې شوي دي چې جمعه د غبرګولي ۲۲مه، د طالبانو ځواکونه د هرات ښار په ځینو برخو او همدارنګه د کابل لوېدیځو سیمو کې ځای پر ځای شوي وو. ځايي اوسېدونکو ویلي چې د طالبانو استخباراتي ځواکونه د احتمالي اعتراضونو د ترسره کېدو له امله په ښار کې په پراخه کچه حضور لري.
هغه انځورونه چې رسنیو ته رسېدلي، د کابل په لوېدیځ او هرات کې د نظامي ځواکونو پراخ حضور ښيي.
ریچارد بنېټ په خپل ایکس حساب کې په یوه یادښت کې د ملګرو ملتونو د کارپوهانو ګډې اعلامیې ته اشاره کړې ده؛ هغه اعلامیه چې په هرات کې د ښځو د نیولو او پر معترضینو د زور کارولو په اړه اندېښنه څرګندوي.
د ملګرو ملتونو کارپوهانو د پنجشنبې په ورځ په یوه ګډه اعلامیه کې د معترضینو او نیول شوو ښځو د سمدستي خوشې کېدو غوښتنه کړې ده. هغوی همدارنګه ټینګار کړی چې باید د نیول شوو کسانو سره ناوړه چلند پای ته ورسېږي او ټپیانو ته د روغتیایي خدماتو لاسرسی تضمین شي.
په دې اعلامیه کې له طالبانو هم غوښتنه شوې چې په هرات کې د کورونو پلټنې ودروي او په دې ولایت کې د تاوتریخوالي د زیاتېدو مخه ونیسي.
لیکواله:سلیمه آریایي
