سیمهییزې سرچینې وايي چې د پخوانیو پوځیانو یو تن، عبدالجبار، په تخار ولایت کې د ناپېژاندو وسلهوالو د برید په پایله کې خپل ژوند له لاسه ورکړی . د دغو سرچینو په وینا، هغه د بدخشان ولایت د یاوان ولسوالۍ اوسېدونکی و او د پېښې پر مهال د ناروغۍ له امله په بستر کې و.
سرچینو د دوشنبې په ورځ، د زمري ۵مه، اعلان وکړ چې دا پېښه شاوخوا یوه اوونۍ وړاندې د تخار ولایت د چاهاب ولسوالۍ په اړوند سیمه کې د عبدالجبار په استوګنځي کې رامنځته شوې ده. د دغو معلوماتو پر بنسټ، ناپېژاند وسلهوال د هغه استوګنځي ته ننوتلي او هغه یې وژلی دی.
تر دې وړاندې هم سیمهییزو سرچینو د افغانستان په بېلابېلو ولایتونو کې د ناپېژاندو وسلهوالو له لوري د یو شمېر پخوانیو پوځیانو د وژل کېدو خبر ورکړی و. د دغو پېښو توضیحات او انګېزه تر اوسه په رسمي ډول نه ده روښانه شوې.
دا پېښې په داسې حال کې راپور کېږي چې واک ته د طالبانو له بيا په رسېدو وروسته، یو شمېر پخواني پوځیان د امنیتي وضعیت او احتمالي غچ اخیستنې د اندېښنو له امله له افغانستانه وتلي او ګاونډیو هېوادونو لکه ایران او پاکستان ته یې پناه وړې ده.
په ورته وخت کې، ځینې پخواني پوځیان چې په افغانستان کې پاتې دي یا له څه مودې وروسته بېرته هېواد ته ستانه شوي، تر اوسه هم له شته امنیتي وضعیت او اندېښنو څخه شکایت کوي.
د هشت صبح ورځپاڼې او یو شمېر نورو رسنیو د یوې ګډې څېړنې د موندنو پر بنسټ، له ۲۰۲۳ کال څخه د ۲۰۲۵ کال تر نیمایي پورې، په افغانستان کې لږ تر لږه ۱۱۰ پخواني پوځیان وژل شوي دي. د دې راپور پر بنسټ، یوازې ۱۸ قضیې د تېر کال په لومړیو اوو میاشتو کې ثبت شوي دي.
ټېلګراف ورځپاڼې هم تر دې وړاندې راپور ورکړی و چې د بریټانیا د دفاع وزارت د معلوماتو له افشا کېدو وروسته د یو شمېر پخوانیو افغان پوځیانو د هویت له څرګندېدو سره، له ۲۰۰ څخه زیات دغه پوځیان وژل شوي دي.
همدارنګه، په افغانستان کې د ملګرو ملتونو د مرستندویه پلاوي دفتر (یوناما) په خپل یوه راپور کې د افغانستان د پخوانیو امنیتي او دفاعي ځواکونو له غړو سره د نه قانع کوونکو وژنو، په خپلسري ډول نیولو، شکنجې او بد چلند د مواردو خبر ورکړی دی.
لیکواله:سلیمه آریایي
