د نورستان د طالبانو د والي مرستیال، فیصل مختار، ویلي چې د تېرې اوونۍ د ویجاړوونکو سېلابونو له امله په دې ولایت کې د وژل شویو کسانو شمېر له ۳۰ تنو اوښتی دی. د هغه په وینا، تر اوسه د ۲۰ قربانیانو مړي موندل شوي او لږ تر لږه ۱۰ نور کسان لا هم ورک دي. هغه زیاته کړه چې د ورکو شویو کسانو د موندلو لپاره د لټون عملیات لا هم روان دي.
دغه مرګوني سېلابونه د دوشنبې په ورځ، د چنګاښ ۲۹مه، د سختو بارانونو له امله د نورستان په بېلابېلو سیمو کې راوتلي وو. دې پېښې د انساني تلفاتو ترڅنګ پراخ مالي زیانونه هم اړولي او سلګونه کورنۍ یې له سختو ستونزو سره مخ کړي دي.
د طالبانو د والي مرستیال وویل چې سېلابونو د نورستان بنسټیزو تاسیساتو ته درانه زیانونه اړولي دي. د هغه په وینا، د ولایت په مرکز کې شاوخوا ۱۰ مارکیټونه، چې له ۹۰ څخه زیات دوکانونه پکې شامل دي، ویجاړ شوي. همدارنګه ۷ کورونه په بشپړ ډول نړېدلي او ۸۲ نور کورونه هم زیانمن شوي دي.
د ملګرو ملتونو د بشري مرستو د همغږۍ دفتر مخکې ویلي وو چې دغو سېلابونو زرګونه کسان اغېزمن کړي او د سرپناه، خوراکي توکو، پاکو اوبو، روغتیايي خدمتونو او حفظالصحې په برخو کې بېړنۍ اړتیاوې رامنځته شوي دي. دې ادارې خبرداری ورکړی و چې د نورستان سېلاب ځپلي د روغتیايي خدمتونو، درملو، د څښاک پاکو اوبو او روغتیايي اسانتیاوو له سخت کمښت سره مخ دي.
نورستان د افغانستان له غرنیو او لرې پرتو ولایتونو څخه دی، او د مرستندویه ادارو چارواکي وایي چې زیانمنو سیمو ته د لاسرسي ستونزې د لټون، ژغورنې او بشري مرستو د رسولو بهیر له جدي ننګونو سره مخ کړی دی.
افغانستان د هغو هېوادونو له ډلې څخه دی چې د اقلیمي بدلونونو د اغېزو پر وړاندې ډېر زیانمنونکی دی. په وروستیو کلونو کې د هېواد په بېلابېلو سیمو کې ناڅاپي سېلابونه، وچکالي او نور سخت اقلیمي بدلونونه زیات شوي، چې څو ځله یې د خلکو د مرګ ژوبلې او پراخو مالي زیانونو لامل شوي دي.
لیکواله:سلیمه آریایي
