د طالبانو یو شمېر مخالفانو د یوې اعلامیې په خپرولو سره غوښتنه کړې چې په افغانستان کې د کورنیو عوایدو او بهرنیو مرستو د لګښت څرنګوالی روښانه شي. دوی ادعا کړې چې طالبانو په تېرو پنځو کلونو کې شاوخوا ۱۴ میلیارده ډالر کورني عواید او ۱۶ میلیارده ډالر بهرنۍ مرستې ترلاسه کړي دي، چې ټولټال یې ۳۰ میلیارده ډالرو ته رسېږي.
په دې اعلامیه کې له طالبانو غوښتل شوي چې د دغو مالي سرچینو د لګښت جزییات د افغانستان له خلکو سره شریک کړي. د اعلامیې خپروونکي وایي، د دومره لوړې کچې عوایدو او بهرنیو مرستو سربېره، د هېواد په اقتصادي او د خلکو په ژوندانه وضعیت کې د پام وړ بدلون نه دی راغلی او ډېری افغانان لا هم له بېوزلۍ، بېکارۍ او اقتصادي ستونزو سره مخ دي.
د افغانستان د ولسي جرګې پخواني غړي ستار حسيني په دې اعلامیه کې ادعا کړې چې په بنسټیزو برخو لکه زدهکړه، روغتیا، سړک جوړونه او اقتصادي پراختیا کې د پام وړ پانګونه نه ده شوې. د هغه په وینا، د عامه خدمتونو وضعیت او د خلکو د ژوند شرایط لا هم له جدي ننګونو سره مخ دي.
په اعلامیه کې طالبان د مالي سرچینو په ناسم مدیریت، بهرنیو شرکتونو ته د کانونو په سپارلو او د عامه شتمنیو په ناسم استعمال تورن شوي دي. همدارنګه له نړیوالې ټولنې غوښتنه شوې چې د عوایدو او نړیوالو مرستو د لګښت څرنګوالی وڅېړي او پایلې یې په روښانه ډول خپرې کړي.
طالبانو تر اوسه دغو ادعاوو ته کوم غبرګون نه دی ښودلی او په رسمي ډول یې د یادو شویو شمېرو یا د کورنیو عوایدو او بهرنیو مرستو د لګښت په اړه څرګندونې نه دي کړي.
لیکواله:سلیمه آریایي
