په ننګرهار کې یوې سرچینې ویلي، د طالبانو د امر بالمعروف او نهی عن المنکر محتسبانو سیمهییز خبریال او ښوونکی عزیزالله عزیز د شینوارو په لویه ولسوالۍ کې له خپل کور څخه نیولی دی.
د سرچینې په وینا، تېره شپه د عزیز په کور کې د موسیقۍ یوه غونډه روانه وه چې د طالبانو محتسبانو پرې چاپه ووهله او د هغه په ګډون یې څو کسان ونیول. د معلوماتو له مخې، نور نیول شوي کسان وروسته خوشې شوي، خو عزیزالله عزیز لا هم د طالبانو په بند کې دی.
طالبانو تر اوسه د دې نیونې په اړه رسمي څرګندونې نه دي کړي.
د ۲۰۲۱ کال له اګست راهیسې، طالبانو پر رسنیو، خبریالانو او هنري فعالیتونو پراخ محدودیتونه لګولي دي. د ملګرو ملتونو د راپورونو له مخې، په افغانستان کې خبریالان له خپلسرو نیونو، ګواښونو، تاوتریخوالي او سانسور سره مخ دي، او د طالبانو د امر بالمعروف قانون د موسیقۍ غږول هم منع کړي دي.
لیکوال:سعید سمیر
