د بدخشان د زېباک ولسوالۍ په یوه غرنۍ سیمه کې د یوې غورځېدلې ډرون د ټوټو د موندل کېدو ادعا شوې، چې د جوړښت او پروپیلر بڼه یې د طالبانو له هغو بېپیلوټه الوتکو سره ورته والی لري چې د بریدونو او نورو موخو لپاره یې کاروي.
د طالبانو مخالفې وسلهوالې ډلې، ازادۍ جبهې ته نږدې سرچینو هغه انځورونه خپاره کړي چې ویل کېږي په یوه غرنۍ سیمه کې د غورځول شوې ډرون له ټوټو اخیستل شوي دي. په دغو انځورونو کې د ډرون ځینې برخې، موتور او پروپیلر لیدل کېږي.
د انځورونو د ظاهري ارزونې له مخې، د ډرون جوړښت، د پروپیلر ډول او ځینې نورې تخنیکي ځانګړنې د هغو بېپیلوټه الوتکو له جوړښت سره ورته دي چې طالبان یې کاروي.
شنونکي وایي، که د دغو پاتې شونو هویت په خپلواکه توګه تایید شي او څرګنده شي چې ډرون د طالبانو اړوند وه، نو دا به د طالبانو د بېپیلوټه الوتکو د کارونې څرنګوالي او عملیاتي ظرفیت په اړه نوې پوښتنې راپورته کړي.
د راپورونو له مخې، هغه ډرونونه چې طالبانو پخوا کارولي، ډېری یې ځانمرګې بېپیلوټه الوتکې وې چې شاوخوا دوه متره تنه او تر تنې اوږده وزرونه یې لرل. په خپرو شویو انځورونو کې ښکاري چې زېباک کې د غورځېدلې ډرون ټوټې هم له هماغه ډول ډرونونو سره ورته والی لري.
تر اوسه طالبانو د دغو ادعاوو، خپرو شویو انځورونو او د ډرون د هویت په اړه رسمي غبرګون نه دی ښودلی.
لیکوال:سعید سمیر
