د بحرالدین جوزجاني نږدې کسانو، چې د مارشال عبدالرشید دوستم په مشرۍ د ملي جنبش ګوند غړی دی، ادعا کړې چې هغه افغانستان ته د طالبانو په بلنه له ستنېدو وروسته نادرکه شوی دی.
د جوزجاني نږدې کسانو یکشنبې د غبرګولي ۲۴مه، رسنیو ته ویلي چې بحرالدین جوزجاني د طالبانو د سیاسي شخصیتونو سره د اړیکو کمیسیون په بلنه افغانستان ته ستون شوی و.
دوی ادعا کړې چې بحرالدین جوزجاني د لوی اختر له دویمې ورځې راهیسې نادرکه دی او د کورنۍ غړي یې د هغه له وضعیت څخه هېڅ خبر نه لري.
د دغه کس نږدې کسانو همدارنګه ادعا کړې چې هغه د طالبانو د استخباراتو او د حقاني شبکې له لوري نیول شوی دی.
تر اوسه طالبانو او د عبدالرشید دوستم په مشرۍ ملي جنبش ګوند د دې موضوع په اړه رسنیو ته څه نه دي ویلي.
دا په داسې حال کې ده چې طالبانو څو ځله له خپلو مخالفو سیاسي مشرانو او شخصیتونو غوښتي چې هېواد ته ستانه شي.
د طالبانو د بیا واکمنۍ وروسته په افغانستان کې، د ملا هبتالله اخندزاده د اعلان شوي عمومي عفوې سربېره، د پخوانیو امنیتي ځواکونو او عادي خلکو د نیولو، شکنجې او وژنې ګڼ راپورونه د دې ډلې د جنګیالیو له خوا ورکړل شوي دي.
لیکواله:سلیمه آریایي
