یو شمېر ښاریانو د جمعې په ورځ د هرات د طالبانو د والي د دفتر مخې ته اعتراضي غونډه ترسره کړه. عیني شاهدان وایي چې د دغې غونډې له پیل وروسته، د طالبانو ځواکونو د لاریون کوونکو د تیتولو لپاره ډزې وکړې.
ترلاسه شوې ویډیوګانې ښيي چې لاریون کوونکي د ښځو د زدهکړې او کار د حق په ملاتړ او همدارنګه د «ښځه، ژوند، ازادي» شعارونه ورکول. په دغو انځورونو کې د ډزو غږ هم اورېدل کېږي.
دغه غونډه په داسې حال کې ترسره شوې چې طالبانو د اعتراض له پیل څخه مخکې د هرات ښار په بېلابېلو برخو کې پراخ امنیتي ځواکونه ځای پرځای کړي وو. محلي سرچینو ویلي چې د دې ځای پرځای کېدو موخه د هر ډول احتمالي اعتراض مخنیوی ښودل شوی.
عیني شاهدانو او د سیمې اوسېدونکو رسنیو ته ویلي چې یو شمېر خلک د طالبانو د والي د دفتر مخې ته راټول شوي وو، خو د اعتراض له پیل سره سم د طالبانو ځواکونو د خلکو د تیتولو لپاره اقدام وکړ.
د خپرو شویو ویډیوګانو له مخې، مظاهرهچیانو د «ښځه، ژوند، ازادي» ترڅنګ د «الله اکبر»، «د زدهکړې او کار حق» او «مرګ پر دیکتاتور» شعارونه هم ورکول.
دا په هرات کې د وروستیو ورځو دوهم ولسي اعتراض بلل کېږي. تر دې وړاندې هم د هرات د جبرییل سیمې یو شمېر اوسېدونکو د ښځو او نجونو د نیولو په غبرګون کې لاریون کړی و، چې د طالبانو د ځواکونو په مداخلې پای ته رسېدلی و.
وروستي اعتراضونه په هرات کې د ښځو د پراخو نیونو د راپورونو په تعقیب رامنځته شوي دي. ملګرو ملتونو مخکې تایید کړې وه چې په تېرو اعتراضونو کې لږ تر لږه یو کس د ډزو له امله وژل شوی دی.
لیکواله:سلیمه آریایي
