د کونړ کې د طالبانو سرچینې د دې ډلې د امنیه قوماندانۍ له قوله وایي چې د یو طالب غړي مېرمن د کونړ په سیند کې ډوبه شوې او له څو ساعتونو تېرېدو وروسته هم د هغې د مړي د موندلو لپاره د لټون عملیات روان دي.
د سرچینو په وینا، دا پېښه د یکشنبې په ماښام، د جنګاښ ۱۴مه، د کونړ ولایت د مرکز اسعدآباد ښار کې رامنځته شوې ده. ویل کېږي چې تر اوسه د ژغورنې ځواکونو او ځایي خلکو هڅې د مړي په موندلو کې نه دي بریالۍ شوي .
په یوه جلا پېښه کې، د کونړ ولایت په غازيآباد ولسوالۍ کې یو ځوان هم د سیند ته د ننوتلو پر مهال ډوب شوی دی. سرچینې وایي چې وروسته د لټون له عملیاتو د دغه ځوان مړی له اوبو را ایستل شوی او کورنۍ ته یې سپارل شوی دی.
د کونړ ولایت سیمهییزو چارواکو تر اوسه د دغو دوو پېښو په اړه رسمي څرګندونې نه دي کړي او د پېښو د څرنګوالي په اړه نور جزئیات هم نه دي خپاره شوي.
دا پېښې په داسې حال کې رامنځته شوي دي چې د هوا د تودوخې د زیاتېدو له امله د افغانستان په بېلابېلو سیمو کې په سیندونو، بندونو او نورو اوبو کې د ډوبېدو پېښې زیاتې شوي دي. د ژغورنې د امکاناتو کمښت، د خوندیتوب د تدابیرو نشتوالی او د عامه پوهاوي کمزورتیا د ډوبېدو له امله د تلفاتو د زیاتېدو اساسي عوامل بلل کېږي.
د طالبانو د پېښو پر وړاندې د چمتووالي ادارې د شمېرو له مخې، یوازې د روان کال په لومړیو دوه نیمو میاشتو کې لږ تر لږه ۷۵ کسان په افغانستان کې د ډوبېدو له امله مړه شوي دي؛ دا داسې شمېر دی چې ښيي په اوسط ډول هره ورځ یو کس د ډوبېدو له امله خپل ژوند له لاسه ورکوي.
لیکواله:سلیمه آریایي
