نن، چهارشنبه، د زمري ۲۸مه، چې د اګست له ۱۹مې سره برابره ده، د افغانستان د خپلواکۍ کلیزه ده؛ هغه ورځ چې ۱۰۷ کاله وړاندې، د افغانستان او انګلیس ترمنځ د درېیمې جګړې په پایله کې، دغه هېواد د خپلې بهرنۍ پالیسۍ واک ترلاسه کړ او د بریټانیا پر وړاندې یې سیاسي خپلواکي ټینګه شوه.
د رسمي تاریخي روایت له مخې، چې د افغانستان بېلابېلو حکومتونو په بېلابېلو دورو کې منلی او پیاوړی کړی، د افغانستان او انګلیس درېیمه جګړه په ۱۹۱۹ کال کې د افغانستان د حکومت او بریټانیا ترمنځ یوې هوکړې ته په رسېدو پای ته ورسېده. دغه هوکړه د افغانستان د خپلواکۍ په بهیر کې د یوه مهم تاریخي پړاو په توګه یادېږي.
په هغه وخت کې د افغانستان د پاچا، امانالله خان، استازو او د بریټانیا د حکومت ترمنځ په راولپنډي کې د جګړې د پای ته رسولو او د دواړو لورو د اړیکو په اړه خبرې وشوې. د راولپنډي تړون د ۱۹۱۹ کال د اګست په ۸مه لاسلیک شو، چې له مخې یې د افغانستان پر بهرنۍ پالیسۍ د بریټانیا د کنټرول د پای ته رسېدو لپاره زمینه برابره شوه.
د هر کال د اګست ۱۹مه په افغانستان کې د خپلواکۍ د ورځې په توګه نمانځل کېږي او په ۲۰۲۶ کال کې د دې تاریخي پېښې ۱۰۷مه کلیزه ده. دغه ورځ په افغانستان کې عمومي رخصتي هم ده.
طالبانو هم نن، د اګست په ۱۹مه، د افغانستان د خپلواکۍ کلیزه نمانځلې او د دې ورځې په مناسبت یې عمومي رخصتي اعلان کړې ده. دې ډلې په خپلو پیغامونو کې د افغانستان خپلواکي په ۱۹۱۹ کال کې د هېواد پر بهرنۍ پالیسۍ د بریټانیا د نفوذ له پای ته رسېدو سره تړلې بللې ده.
لیکواله:سلیمه آریایي
