پخواني ولسمشر محمد اشرف غني د افغانستان د کرکټ ملي لوبډلې د پخواني چټک توپاچوونکي شاپور ځدراڼ پر مړینه ژوره خواشیني څرګنده کړې او هغه یې د افغان کرکټ یو ستر اتل بللی دی.
اشرف غني په خپلې فېسبوکپاڼې کې لیکلي، شاپور ځدراڼ په هغو سختو کلونو کې چې افغان کرکټ د ودې په لومړیو پړاوونو کې و، د خپلو غوره لوبو او نه ستړې کېدونکو هڅو له لارې هېواد ته ویاړونه او ولس ته خوښۍ وربښلي.
هغه د شاپور ځدراڼ مړینه د افغانستان د کرکټ لپاره یوه ستره ضایعه بللې او ویلي یې دي چې د نوموړي خدمتونه او لاسته راوړنې به د افغان ورزش په تاریخ کې تلپاتې پاتې شي.
اشرف غني د ارواښاد شاپور ځدراڼ کورنۍ، خپلوانو او د افغانستان خلکو ته د تسلیت ترڅنګ، د هغوی لپاره د جمیل صبر او شاپور ځدراڼ ته د فردوس جنت دعا کړې ده.
لیکوال:سعید سمیر
