د ازبکستان د ملي احصایې کمېټې د معلوماتو له مخې، د ۲۰۲۶ کال په لومړیو میاشتو کې د افغانستان او ازبکستان ترمنځ د سوداګرۍ ټولیز حجم ۹۱۵.۸ میلیونه ډالرو ته رسېدلی او افغانستان د دغه هېواد له لسو سترو سوداګریزو شریکانو څخه شمېرل کېږي.
د شمېرو له مخې، ازبکستان افغانستان ته د ۸۰۴ میلیونه ډالرو په ارزښت صادرات او له افغانستانه د ۱۱۱ میلیونه ډالرو په ارزښت واردات کړي دي.
بل لور ته، د طالبانو د صنعت او سوداګرۍ وزارت ویلي، د افغانستان–ازبکستان د سوداګرۍ فورم پر مهال د دواړو هېوادونو د خصوصي سکټورونو ترمنځ ۲۲ سوداګریز تړونونه، چې ارزښت یې له ۲۰۰ میلیونه ډالرو زیات دی، لاسلیک شوي دي.
طالبانو همداراز ویلي، د ۲۰۲۶ کال له پیل راهیسې د دواړو هېوادونو ترمنځ د ۱.۴ میلیارده ډالرو په ارزښت ۹۰ سوداګریز تړونونه او د تفاهم یادښتونه لاسلیک شوي او دواړه لوري هڅه کوي کلنۍ سوداګري ۵ میلیارده ډالرو ته لوړه کړي.
لیکوال:سعید سمیر
