په وروستیو اوونیو کې د طالبانو او پاکستان ترمنځ د ترینګلتیاوو له زیاتېدو وروسته، پاکستاني امنیتي سرچینو رسنیو ته ویلي چې د یکشنبې په ورځ، د چنګاښ ۲۸مه، د پکتیا ولایت او د کرم سیمې ترمنځ پر پوله د طالبانو ځواکونو او پاکستاني پوځیانو ترمنځ نښته شوې ده. د دغو سرچینو په وینا، دا نښته څو ساعته وروسته پای ته رسېدلې.
پاکستاني امنیتي سرچینې ادعا کوي چې دغه نښته هغه مهال پیل شوه، کله چې د طالبانو ځواکونو د درنو وسلو، هاوانونو او نورو پوځي تجهیزاتو په کارولو سره د پاکستان سرحدي پوستې په نښه کړې. د سرچینو په وینا، پاکستاني ځواکونو هم د سپکو وسلو، توپخانې او نورو جګړهییزو وسلو په وسیله ځوابي برید وکړ.
د دغو سرچینو د معلوماتو له مخې، پاکستاني ځواکونو د نښتې پر مهال د طالبانو څو سرحدي پوستې او دفاعي سنګرونه په نښه کړي.
د دې نښتې د پیل اصلي لامل تر اوسه نه دی روښانه شوی، او د دواړو لورو د احتمالي مرګژوبلې او زیانونو په اړه هم کوم رسمي راپور نه دی خپور شوی. طالبانو هم د دې خبر تر خپرېدو پورې د دغې نښتې او د پاکستاني امنیتي سرچینو د ادعاوو په اړه څه غبرګون نه دی ښودلی.
لیکواله:سلیمه آریایي
