د طالبانو د اطلاعاتو او کلتور وزارت نشراتي مرستیال، مهاجر فراهي، د امریکا د ولسمشر ډونالډ ټرمپ هغو وروستیو څرګندونو ته غبرګون ښودلی چې ویلي یې وو امریکا باید د بګرام هوايي اډه بېرته ترلاسه کړي. فراهي ویلي، بګرام د طالبانو تر بشپړ کنټرول لاندې دی او د دوی له واکه به ونه وځي.
هغه زیاته کړې چې د بګرام هوايي اډه اوس د طالبانو په لاس کې ده او ټرمپ به د دې اډې د بېرته نیولو هیله یوازې په خوبونو کې وویني.
بګرام هوايي اډه، چې د ۲۰۰۱ کال د سپټمبر له یوولسمې بریدونو وروسته د امریکا او د هغې د متحدینو تر ټولو مهم پوځي مرکز ګڼل کېده، نږدې شل کاله یې په افغانستان کې د نړیوالو ځواکونو د عملیاتو لپاره اساسي رول درلود. دغه اډه په ۲۰۲۱ کال کې د امریکايي ځواکونو له وتلو وروسته د طالبانو ولکې ته ولوېده.
بلخوا، ډونالډ ټرمپ په وروستیو میاشتو کې څو ځله ټینګار کړی چې امریکا باید د بګرام اډه د خپل ستراتیژیک موقعیت له امله ساتلې وای، ځکه د هغه په وینا، دا اډه چین او ایران ته نږدې مهم اهمیت لري.
که څه هم طالبان د بګرام په اړه د امریکا هر ډول ادعا ردوي، خو د دوحې له هوکړې وروسته د افغانستان د سیاسي وضعیت او د دواړو لورو د ژمنو په اړه بحثونه لا هم دوام لري.
لیکوال:سعید سمیر
