په افغانستان کې د لومړي ځل لپاره د اعصابو د جراحي ملي ټولنې دفتر پرانېستل شو. د اعصابو د جراحي متخصص ډاکټر خالد ځدراڼ دا اقدام د هېواد په طبي برخه کې یو تاریخي ګام وباله او ویې ویل، چې دغه ټولنه به د افغان اعصابو جراحانو د مسلکي یووالي، علمي همکارۍ او د دې برخې د ودې لپاره کار وکړي.
د نوموړي په وینا، افغان اعصابو جراحانو تر دې وړاندې داسې یوه ملي او مسلکي ټولنه نه لرله چې د دوی استازیتوب وکړي او تر یوه چتر لاندې یې راټول کړي. هغه زیاته کړه، چې د دې ټولنې په جوړېدو سره د ډاکټرانو د یووالي او د اعصابو د جراحي د پرمختګ پخوانۍ هیله عملي شوې ده.
د ټولنې مسوولان وایي، چې د افغانستان د اعصابو د جراحي ملي ټولنه به د زده کړو، علمي څېړنو، مسلکي همکاریو او د ډاکټرانو د ظرفیت لوړولو په برخو کې فعالیت وکړي، څو په هېواد کې د اعصابو د جراحي خدمتونه نړیوالو معیارونو ته ورسوي.
ډاکټر خالد ځدراڼ د دې ټولنې جوړېدل د ټولو افغان ډاکټرانو ګډ ویاړ وباله او هیله یې څرګنده کړه، چې د ګډو هڅو په مټ به ناروغانو ته لا معیاري او غوره روغتیايي خدمات وړاندې شي.
لیکوال:سعید سمیر
