د حسیب پنجشېري وژل کېدل؛ د مقاومت ملي جبهې د خپلو فعالیتونو د دوام خبر ورکړ.
عبدالله خنجاني، د افغانستان د مقاومت ملي جبهې د سیاسي دفتر مشر، اعلان کړی چې حسیب پنجشېري، د دې جبهې له لوړپوړو قوماندانانو څخه، له خپلو یو شمېر سرتېرو سره یوځای د هندوکش د غرونو په لمنو کې د نښتې پر مهال وژل شوی دی.
ښاغلي خنجاني حسیب پنجشېري د ملي مقاومت جبهې له مخکښو قوماندانانو څخه وباله او ویې ویل چې نوموړي د خپلو فعالیتونو پر مهال د ارادې، مبارزې، زړورتیا او مقاومت په یوه نښه بدل شوی و.
د خنجاني په وینا، په افغانستان کې دننه د حسیب پنجشیري وژل کېدل ښيي چې د ملي مقاومت جبهې ځواکونه لا هم په هېواد کې حضور لري. هغه ټینګار وکړ چې د دغه قوماندان وژل کېدل د مقاومت د فعالیتونو د پای ته رسېدو په معنا نه دي او دا پېښه یې « یوه نوی پیل» وباله.
د مقاومت ملي جبهې د سیاسي دفتر مشر همداراز وویل چې په تېرو کلونو کې د دې جبهې لسګونه لوړپوړي او نااشنا قوماندانان په نښتو کې وژل شوي، خو د هغه په وینا، د مقاومت فعالیتونه او لاره به دوام ولري.
خنجاني د خپلو خبرو په یوه بله برخه کې په بدخشان کې د طالبانو د ناراضي قوماندان جمعهخان فاتح وضعیت ته هم اشاره وکړه. فاتح له څو اوونیو راهیسې د طالبانو له رهبرۍ سره له کړکېچ وروسته، په نسي کې د دې ډلې د ځواکونو له ځای پر ځای کېدو سره، د طالبانو د لوی درستیز فصیحالدین فطرت له ضمانت ترلاسه کولو وروسته د خبرو لپاره فیضآباد ته تللی و.
خنجاني ادعا وکړه چې طالبانو د جمعهخان فاتح تر فشار لاندې راوستلو او د هغه د مقاومت د لګښت لوړولو لپاره د هغه د کورنۍ یو شمېر غړي د «انساني سپر» په توګه کارولي دي. دا ادعا د خپلواکو سرچینو له خوا نه ده تایید شوې.
هغه همداراز طالبان تورن کړل چې افغانستان د «کورنۍ جګړې» پر لور بیايي. نوموړي وویل چې د ده په باور، په هېواد کې بېوزلي، تاوتریخوالی، تعصب، ظلم او تېری زیات شوی او طالبان د دې وضعیت مسؤل دي.
خنجاني د طالبانو د مخالفینو لپاره د سراجالدین حقاني د وروستیو څرګندونو په غبرګون کې، چې له مخالفینو یې غوښتي وو جګړه پرېږدي، وویل چې حقاني باید تر دې ډول غوښتنې مخکې له تاوتریخوالي، تکبر، د افغانستان له منزوي کولو او هغه څه څخه چې نوموړي یې د افغان ښځو پر وړاندې غیرانساني چلند وباله، لاس واخلي.
حسیب پنجشېري، چې په «حسیب قوای مرکز» مشهور و، د افغانستان د مقاومت ملي جبهې له مخکښو قوماندانانو څخه و. هغه د جمهوري نظام له سقوط مخکې، له پوځي زدهکړو وروسته، د ملي امنیت ځانګړو ځواکونو سره یوځای شوی و او په بېلابېلو عملیاتو کې یې ګډون کړی و.
وروسته له هغه چې طالبان د ۱۴۰۰ لمریز کال په زمري کې کابل ته ننوتل، حسیب پنجشېري پنجشېر ته ولاړ او د طالبانو پر وړاندې یې خپلو پوځي فعالیتونو ته دوام ورکړ. په وروستیو کلونو کې هم د هندوکش په غرنیو سیمو کې له خپلو ځواکونو سره د هغه د حضور انځورونه او ویډیوګانې خپرې شوې وې.
طالبانو د پنجشنبې په ورځ، د زمري په ۲۹مه، اعلان وکړ چې حسیب پنجشېري د دې ډلې د ځانګړو ځواکونو د «یوه پېچلي عملیات» په ترڅ کې وژل شوی دی. د مقاومت ملي جبهې هم د هغه وژل کېدل تایید کړي او د خپلو فعالیتونو د دوام خبر یې ورکړی دی.
لیکواله:سلیمه آریایي
