د نیویارک ښاروال په تندو څرګندونو کې بنیامین نتانیاهو «د جګړې مجرم» او «د فلسطیني ولس پر ضد د یوې وېروونکې نسلوژنې طراح» وباله. هغه ادعا وکړه چې نتانیاهو د څه باندې ۷۳ زره فلسطینیانو د وژل کېدو، د لسګونو زرو ماشومانو د معلولېدو، او د ډېرو هغو ماشومانو د داسې حالت مسؤل دی چې له بېهوښۍ پرته یې د بدن غړي پرې شوي دي.
هغه همدارنګه وویل چې نتانیاهو د هغو روغتونونو د په نښه کولو مسؤل دی چې د نویو زېږېدلو ماشومانو لپاره ځانګړي شوي، او همدارنګه د امیندوارو میندو د پاملرنې مرکزونه دي؛ داسې اقدام چې د هغه په وینا، ان نویو زېږېدلو ماشومانو ته یې د ژوند فرصت هم نه دی پرېیښی.
د نیویارک ښاروال زیاته کړه چې د خوړو او بشري مرستو د ننوتلو مخنیوی، د ګڼ شمېر خلکو وږي ساتل، او د سلګونو مرستندویانو او خبریالانو وژل هم هغه کړنې دي چې مسؤلیت یې د اسرائیلو د لومړي وزیر پر غاړه دی.
هغه د ملګرو ملتونو د وروستي راپور په حواله وویل چې دغه سازمان تېره میاشت تایید کړې چې فلسطیني ماشومان لا هم په قصدي ډول د اسرائیلي وسلهوالو ځواکونو له خوا په نښه کېږي او وژل کېږي، او دا هر څه له هغه څه څخه چې «اوربند» بلل شوی، تر اته میاشتو ډېر وروسته هم دوام لري.
د نیویارک ښاروال وویل: «د دغو کړنو لړۍ لا هم روانه ده، په داسې حال کې چې موږ، د امریکایانو په توګه، د هغو بمونو لګښت ورکوو چې دغه وژنې ترسره کوي.»
هغه د نتانیاهو پر ضد د جرمونو نړیوالې محکمې د نیولو حکم ته په اشارې وویل: «یو دلیل شته چې د جرمونو نړیوالې محکمې د هغه د نیولو حکم صادر کړی دی. موږ د انسانانو په توګه، د نسلونو په اوږدو کې دې ګډ درک ته رسېدلي یو چې ځینې جرمونه دومره وحشتناک وي چې د ټول بشریت وجدان ټپي کوي.»
هغه زیاته کړه: «هر څوک چې په خپلو سترګو وویني، په خپل زړه یې احساس کړي او په خپل وجدان یې قضاوت وکړي، باید هغه ویجاړۍ درک کړي چې ده رامنځته کړي دي او پوه شي چې د هغه ځای د یوې محکمې مخې ته دی.»
د نیویارک ښاروال همدارنګه ټینګار وکړ: «لکه څنګه چې ما مخکې هم ویلي، زه د جرمونو نړیوالې محکمې له دې نظر سره موافق یم چې بنیامین نتانیاهو باید ونیول شي او د هغه تورونو ته رسېدنه وشي، لکه څنګه چې د هر هغه چا په اړه باید وشي چې د دې محکمې له خوا تورن شوی وي.»
هغه زیاته کړه چې د نیویارک ښاروالۍ ټولې قانوني لارې ارزولي دي څو معلومه کړي چې که نتانیاهو دې ښار ته داخل شي، ایا ښار کولی شي د جرمونو نړیوالې محکمې د نیولو حکم عملي کړي که نه. د هغه په وینا، د دې ارزونو پایله دا ښيي چې د نیویارک ښار په خپلواکه توګه د دې حکم د عملي کولو قانوني واک نه لري، خو د امریکا فدرالي حکومت دا واک لري او باید د جرمونو له نړیوالې محکمې سره همکاري وکړي او د نیولو حکم یې عملي کړي.
د نیویارک ښاروال د خپلو خبرو په بله برخه کې ټینګار وکړ: «بنیامین نتانیاهو په نیویارک ښار کې ښه راغلاست نه دی، او نه هم کوم بل د جګړې مجرم چې په ازاد ډول تګ راتګ کوي، په دې ښار کې ځای لري.»
هغه په پای کې وویل: «که څه هم موږ یوازې په خپل سر دا نسلوژنه نه شو درولای، خو دا پرېکړه کولای شو چې زموږ چوپتیا په یوې بلې وسلې بدله نه شي، او د انسانیت او د ټولو انسانانو د کرامت د دفاع لپاره له خپلو ټولو شته امکاناتو څخه کار واخلو. دا زما ژمنه ده.»
لیکواله:سلیمه آریایي
