د افغانستان وتلی لیکوال، تاریخپوه او د پښتو ژبې او ادب مخکښ شخصیت استاد حبیب الله رفیع د سې شنبې سهار له بهرني سفر وروسته بېرته هېواد ته راستون شو.
استاد رفیع، چې د افغانستان د فرهنګي او علمي ډګر له پېژندل شویو څېرو څخه ګڼل کېږي، له یوې مودې راهیسې په کاناډا کې مېشت و. نوموړي د خپل علمي او فرهنګي ژوند ډېره برخه د افغانستان د تاریخ، ژبې، فولکلور او کلتوري میراث د څېړنې او لیکنې لپاره ځانګړې کړې ده.
د هغه راستنېدل د فرهنګي او ادبي ټولنو له مثبت غبرګون او هرکلي سره مخ شوي دي. ګڼو فرهنګي فعالانو او لیکوالانو د استاد رفیع حضور د هېواد د علمي او ادبي فضا لپاره مهم بللی دی.
استاد حبیب الله رفیع د لسګونو اثارو او سلګونو څېړنیزو لیکنو لیکوال دی. د پښتو ادب، افغان تاریخ او ملي فرهنګ په اړه د هغه آثار د هېواد د علمي پانګې مهمه برخه ګڼل کېږي.
تر اوسه طالبانو د نوموړي د راستنېدو په تړاو رسمي څرګندونې نه دي کړي. دا په داسې حال کې ده چې د طالبانو له بیا واکمنېدو وروسته ګڼ شمېر استادان، څېړونکي او لوستي افغانان له هېواده وتلي دي.
د استاد رفیع راستنېدل داسې مهال کېږي چې په وروستیو کلونو کې د افغانستان د تاریخي او کلتوري هویت اړوند د یو شمېر کتابونو او خپرونو پر محدودیتونو هم نیوکې شوي دي.
لیکوال:سعید سمیر
