د بدخشان ولایت د نسي ولسوالۍ یو شمېر اوسېدونکو د یکشنبې په سهار د درواز په ولسوالۍ کې د کانونو د فعالیتونو د بندېدو پر ضد لاریون وکړ. په هغه ویډیو کې چې د افغانستان انټرنیشنل رسنۍ ته رسېدلې، لیدل کېږي چې دا لاریون له کومې شخړې او تاوتریخوالي پرته ترسره شوی دی.
ځايي سرچینو دې رسنۍ ته ویلي چې جمعهخان فاتح، د طالبانو یو ناراض قوماندان، د دې اعتراض په تنظیم کې رول لرلی دی. په همدې ویډیو کې د یوې دیني مدرسې یو مسؤل هم خبرداری ورکړی او ویلي یې دي چې د ولسي پاڅونونو رامنځته کېدل منفي پایلې لرلی شي، او له چارواکو یې غوښتي چې په پرېکړو کې د خلکو حقونه په پام کې ونیسي.
لاریون کوونکو په دې غونډه کې ټینګار کړی چې د کانونو د فعالیتونو محدودیت په سیمه کې د کار فرصتونه له منځه وړي دي. د هغوی په وینا، د استخراج بندېدو د سلګونو کورنیو معیشت اغېزمن کړی دی.
د ځايي سرچینو د راپور له مخې، تېره میاشت د بدخشان او تخار ولایتونو سیمهییزو طالب چارواکو د بېلابېلو دلایلو له مخې د سرو زرو د ټولو محلي استخراج شرکتونو فعالیتونه بند کړي وو، او اوس یوازې هغو شرکتونو ته د فعالیت اجازه شته چې له طالبانو سره تړلي بلل کېږي.
همدارنګه راپور ورکړل شوی چې د دروازو په ولسوالیو کې د سرو زرو د استخراج شرکتونو د فعالیت د بندېدو امر د بدخشان د طالب سیمهییزو چارواکو له لوري صادر شوی دی. دا پرېکړه داسې مهال عملي شوې چې تر دې وړاندې هم په دې ولایت کې ورته محدودیتونه لګول شوي وو.
په وروستیو میاشتو کې د بدخشان او تخار د سرو زرو د کانونو پر سر ترینګلتیاوې زیاتې شوې دي او څو ځله د ځايي کارګرو، وسله والو ډلو او د طالبانو اړوندو ځواکونو ترمنځ خونړیو نښتو ته هم اوښتي دي. په یوه پېښه کې د شکي ولسوالۍ د قطقطي د سرو زرو په کان کې نښته کې یو شمېر کسانو ته مرګ ژوبله اوښتې وه.
په دې سیمو کې دودیزه د سرو زرو استخراج کلونه د زرګونو کورنیو د عاید اصلي سرچینه وه، او تر دې وړاندې هم پخوانیو حکومتونو په دې برخه کې پر محلي فعالیتونو پراخ محدودیتونه نه وو لګولي.
لیکواله:سلیمه آریایي
