ښځینه ناروغانې د ننګرهار ولایت د شینوارو ولسوالۍ په روغتیايي مرکزونو کې د ښځینه ډاکټرانو له کمښت څخه شکایت کوي او وايي چې په ډېرو مواردو کې د الټراساونډ لپاره اړ کېږي چې نارینه ډاکټرانو ته مراجعه وکړي.
یو شمېر ښځې وايي، سره له دې چې د ځینو روغتونونو او روغتیايي مرکزونو پر لوحو د ښځینه ډاکټرانو نومونه لیکل شوي، خو په عملي توګه د دوی الټراساونډ د نارینه ډاکټرانو له خوا ترسره کېږي او ښځینه ډاکټرانو ته د لاسرسي امکانات محدود دي.
دغې ښځې وايي چې د ځینو طبي معایناتو، په ځانګړي ډول د الټراساونډ، ترسره کېدل د نارینه ډاکټرانو له خوا د دوی لپاره له کلتوري او شخصي پلوه ستونزمن دي. دوی غواړي چې ښځینه ډاکټرانو او نورو ښځینه روغتیايي کارکوونکو ته د لاسرسي زمینه لا زیاته برابره شي.
په داسې حال کې د ښځینه ډاکټرانو کمښت د افغانستان په ځینو برخو کې مخ پر زیاتېدو دی چې پر نجونو د زدهکړو لګېدلو محدودیتونو، په ځانګړي ډول د طبي زدهکړو په برخه کې، په هېواد کې د ښځینه روغتیايي کارکوونکو د راتلونکې په اړه اندېښنې زیاتې کړي دي.
فعالانو او یو شمېر روغتیايي کارکوونکو خبرداری ورکړی چې د دغو محدودیتونو دوام به په راتلونکو کلونو کې د ښځینه ډاکټرانو، قابلو، نرسانو او نورو ښځینه روغتیايي کارکوونکو د شمېر د لا کمېدو لامل شي؛ هغه موضوع چې کولی شي روغتیايي خدمتونو ته د ښځو او نجونو لاسرسی له لا ډېرو ستونزو سره مخ کړي.
په ننګرهار کې ښځې له روغتیايي چارواکو غواړي چې د ښځینه ډاکټرانو د کمښت د حل لپاره اقدام وکړي او په روغتیايي مرکزونو کې د ښځینه کارکوونکو له خوا د روغتیايي خدمتونو د وړاندې کولو زمینه برابره کړي، په ځانګړي ډول په هغو برخو کې چې ښځینه ناروغانې د ښځینه ډاکټرې حضور ته اړتیا لري.
لیکواله:سلیمه آریایي
