په هرات کې د څو ښځو د نیول کېدو او د جبرئیل ښارګوټي د ولسي اعتراضونو وروسته، د طالبانو د اطلاعاتو او کلتور ریاست په دې ولایت کې د ښځو د جامو او په ټولنه کې د حضور په اړه یوه اطلاعیه خپره کړې ده.
د باختر خبري اژانس له خوا د چهارشنبې د غبرګولي ۲۰مه خپره شوې دغه اطلاعیه کې طالبانو یو ځل بیا د ښځو د جامو په اړه خپل نظرونه او مقرراتو باندې ټینګار کړی دی.
په دې اطلاعیه کې ویل شوي چې «د ښځې غږ عورت دی»، د ښځو د بدن پټول ضروري بلل شوي او د هغوی د مخ پټول هم الزام ګڼل شوی دی.
دغه اطلاعیه همدارنګه د ښځو د جامو ډول، په ټولنه کې د هغوی د حضور شرایط او ځینې نور رفتاري محدودیتونه هم تر بحث لاندې نیولي او د هغوی د رعایت کولو غوښتنه شوې ده.
د خپرو شویو معلوماتو له مخې، د بدن بشپړ پټول، د مخ پټول، د نرۍ یا تنګو جامو نه اغوستل، په عامه ځایونو کې د لوړ غږ نه پورته کول، او د نامحرم نارینه وو له کتلو څخه د ښځو د ساتنې موضوعات هغه ټکي دي چې په دې لارښود کې پرې ټینګار شوی دی.
په دې اطلاعیه کې همدارنګه د ښځو د کور څخه د وتلو د اړتیاوو په حد پورې محدودولو یادونه هم شوې ده.
دا مقررات د طالبانو د «امر بالمعروف او نهی عن المنکر» قانون د دیارلسمې مادې برخه بلل کېږي؛ هغه قانون چې له تصویب وروسته د بشري حقونو د ادارو او د ځینو نړیوالو چارواکو له سختو نیوکو سره مخ شوی دی.
د دې اطلاعیه خپرېدل په داسې حال کې شوي چې راپورونه د هرات، په ځانګړي ډول د جبرئیل ښارګوټي کې، د وروستیو اعتراضونو وروسته د امنیتي تدابیرو د زیاتېدو ښودنه کوي. طالبانو تر اوسه د دې سیمې د امنیتي وضعیت او د اعتراضونو اړوند پېښو په اړه نور جزئیات نه دي خپاره کړي.
لیکواله:سلیمه آریایي
