د طالبانو د ریاستالوزرا اداري مرستیال، مولوي عبدالسلام حنفي، اعلان کړی چې هر کال له ۱۲ میلیارده افغانیو څخه ډېره بودجه د هغو کسانو د وارثانو د کفالت لپاره ځانګړې کېږي چې طالبان یې «شهیدان» بولي، او همداراز د یتیمانو او معلولینو لپاره هم مرسته ورکول کېږي.
حنفي دا څرګندونې د افغانستان د طالبانو د واکمنۍ د پنځمې کلیزې په مراسمو کې کړي دي. هغه ویلي چې د کفالت پروګرام د جګړو د وژل شویو کسانو د کورنیو دوه ډلې رانغاړي او هغوی ته هر کال مالي مرستې ځانګړې کېږي.
د هغه په وینا، له دغو ډلو څخه یوه یې د طالبانو جنګیالي دي چې د دې ډلې په رسمي ادبیاتو کې «شهیدان» بلل کېږي. دویمه ډله د تېر حکومت د امنیتي ځواکونو د هغو غړو کورنۍ دي چې د جګړو پر مهال وژل شوي دي.
حنفي زیاته کړې چې طالبان د تېر حکومت د امنیتي ځواکونو غړو ته، د خپلو ځواکونو پر خلاف، د «شهید» اصطلاح نه کاروي، بلکې هغوی «وژل شوي» بولي؛ خو ادعا یې کړې چې د دواړو ډلو وارثان له مالي مرستو برخمن کېږي.
د طالبانو د ریاستالوزرا اداري مرستیال همداراز ادعا کړې چې دغه مرستې له تبعیض پرته او په مساوي ډول د پروګرام ټولو مستحقو کسانو ته وېشل کېږي او د دې پروګرام لپاره د ځانګړې شوې بودجې ټوله اندازه هر کال له ۱۲ میلیاردو افغانیو څخه ډېره ده.
د حنفي د څرګندونو له مخې، دغه پروګرام د جګړو د وژل شویو کسانو د وارثانو ترڅنګ، یتیمان او معلولین هم رانغاړي. هغه د تر پوښښ لاندې کسانو د شمېر او هرې کورنۍ ته د ورکړل کېدونکې مرستې د اندازې په اړه نور جزئیات وړاندې نه کړل.
لیکواله:سلیمه آریایي
