د طالبانو ویاند، ذبیح الله مجاهد، وايي چې ښايي د کابل لوېدیځ کې په یوه ښوونځي چاودنه د داعش یا «له هغه سره د تړلو کړیو» له خوا شوې وي. هغه ټینګار کړی چې د دې پېښې په اړه څېړنې روانې دي او د طالبانو امنیتي ځواکونه هڅه کوي چې عاملان یې وپېژني او ونیسي.
مجاهد د سې شنبې په ورځ، د زمري ۲۷مه، وویل چې د لومړنیو معلوماتو له مخې، یو لاسي بم د یوه ښوونځي دننه غورځول شوی دی. د هغه په وینا، د دې بم د چاودنې له امله شاوخوا ۲۵ زدهکوونکي ټپیان شوي او د هغوی ټپونه سطحي دي.
دا چاودنه د دوشنبې په مازیګر، د زمري په ۲۶مه، د کابل په لوېدیځ کې د دشت برچي په سیمه او د مهدیه ښارګوټي کې د «شمع هدایت خصوصي ښوونځي» ته څېرمه شوې ده. تر اوسه هېڅ یوې ډلې د دې پېښې مسؤلیت نه دی منلی.
خو د روغتونونو د سرچینو معلومات ښيي چې په دې پېښه کې د ټپیانو شمېر نږدې ۵۰ تنو ته رسېږي او ویل کېږي چې ډېری ټپیان ماشومان او زدهکوونکي دي. دغه شمېر د طالبانو د ویاند له خوا له اعلان شوې شمېرې سره توپیر لري.
د هغه لېست له مخې چې رسنیو د کابل لوېدیځ کې له یوه روغتون څخه ترلاسه کړی، لږ تر لږه ۱۹ ټپیان له چاودنې وروسته دغه روغتیايي مرکز ته انتقال شوي دي. په دوی کې ۱۴ نجونې هم شاملې دي چې عمرونه یې د ۹ او ۱۴ کلونو ترمنځ دي.
طالبانو ویلي چې د چاودنې د څرنګوالي د روښانه کولو او د عاملانو د پېژندلو لپاره امنیتي څېړنې روانې دي. د دې راپور تر خپرېدو پورې هېڅ یوې ډلې د دې برید مسؤلیت نه دی منلی.
لیکواله:سلیمه آریایي
