ځايي سرچینې وايي وحیدالله وصال، چې په ننګرهار کې د طالبانو د یوه زندان د کشف مسوول و، د دوشنبې په ماښام، د تلې په ۱۳مه، په جلالاباد ښار کې د ناپېژانده وسلهوالو کسانو په ډزو کې وژل شوی دی.
په ننګرهار کې د طالبانو د امنیه قوماندانۍ سرچینو هم د وصال وژل کېدل تایید کړي او ویلي یې دي چې د پېښې د عاملینو د پېژندلو او نیولو هڅې پیل شوې دي.
د سرچینو په وینا، تر اوسه د دې برید انګېزه او هدف روښانه نه دی او د طالبانو امنیتي ادارو د پېښې د څرنګوالي په اړه خپلې څېړنې پیل کړې دي.
د عیني شاهدانو په وینا، برید کوونکي له برید وروسته له سیمې تښتېدلي او د دغه طالب چارواکي جسد روغتون ته انتقال شوی دی.
د دې راپور تر خپرېدو پورې هېڅ ډلې د دې برید مسوولیت نه دی منلی.
په وروستیو میاشتو کې په ننګرهار او د افغانستان په یو شمېر ختیځو ولایتونو کې د ناامنۍ او هدفي بریدونو یو شمېر پېښې راپور شوې دي. د طالبانو امنیتي چارواکي تل ټینګار کوي چې په ښارونو کې امنیت ټینګ دی؛ خو له دې سره سره، په ځینو مواردو کې د دې ډلې غړي او چارواکي د ناپېژانده وسلهوالو کسانو یا مخالفو ډلو له خوا په نښه شوي دي.
لیکواله:رویا ستانکزی
