د طالبانو د رئیسالوزرا محمدحسن اخوند د پنجشنبې په ورځ د کابل ولایت د سروبي ولسوالۍ په سیمه کې د کابل–جلالاباد د دویم سړک د جوړولو له روانې پروژې څخه لیدنه وکړه. دا لومړی ځل دی چې نوموړی د سړک جوړونې له یوې پروژې څخه لیدنه کوي.
د طالبانو د ارګ د پنجشنبې، د چنګاښ ۱۱مې، په خپره شوې خبرپاڼه کې راغلي چې محمدحسن اخوند د دې لیدنې پر مهال وویل، د دې پروژې په بشپړېدو سره به د ترانسپورټ اسانتیاوې زیاتې شي او د سیمو اقتصادي وده به پیاوړې شي.
د طالبانو رئیسالوزرا په رسمي غونډو کې له نورو طالب چارواکو سره ډېر کم ښکاره کېږي، او تر اوسه یې نه د پام وړ بهرني سفرونه کړي او نه هم د ولایتونو مهم سفرونه ترسره کړي دي.
طالبانو د ۱۴۰۳ کال د لړم په میاشت کې د کابل–جلالاباد د دویم سړک د جوړولو د پروژې د پیل اعلان کړی و. د دوی په وینا، د دې پروژې لګښت به د ترانزیټي حقالعبور له عوایدو څخه تمویل شي.
طالبان وایي، د دې سړک د دویمې برخې د جوړولو چارې، چې ۳۲ کیلومتره اوږدوالی لري، د کابل له لوري پیل شوې او تر اوسه شاوخوا ۲۰ سلنه پرمختګ لري.
د طالبانو په وینا، د دې سړک د لومړۍ برخې د جوړولو چارې هم، چې ۲۲ کیلومتره اوږدوالی لري، د ننګرهار له لوري روانې دي.
لیکواله:سلیمه آریایي
