د طالبانو د مرستیال ویاند، حمدالله فطرت د افغانستان د کرکټ ملي لوبډلې د پخواني او نامتو تېز توپ اچونکي، شاپور ځدراڼ پر مړینه ژوره خواشیني څرګنده کړې او د هغه مړینه یې د افغانستان د ورزش لپاره ستره ضایعه بللې ده.
فطرت په خپل پیغام کې ویلي، شاپور ځدراڼ د افغانستان د کرکټ په تاریخ او د ورزش په ډګر کې د هېواد په ځلېدو کې بې ساري او نه هېرېدونکي خدمتونه کړي دي. هغه زیاته کړې، چې د نوموړي مړینه د افغانستان د ورزش د کورنۍ لپاره لوی زیان دی.
د طالبانو مرستیال ویاند د خپلې خواخوږۍ او تسلیت مراتب د ارواښاد شاپور ځدراڼ کورنۍ، د افغانستان کرکټ بورډ او د هغه ټولو مینهوالو ته وړاندې کړي دي.
هغه د خپل پیغام په پای کې له الله تعالی څخه د شاپور ځدراڼ لپاره د فردوس جنت، د هغه کورنۍ ته د جمیل صبر دعا کړې او د ارواښاد روح یې ښاد او یاد یې تلپاتی غوښتی دی.
دا په داسې حال کې ده، چې د شاپور ځدراڼ له مړینې وروسته د هېواد دننه او بهر ګڼو چارواکو، پخوانیو مشرانو، ورزشکارانو او د کرکټ مینهوالو د خواخوږۍ پیغامونه خپاره کړي او د هغه مړینه یې د افغان کرکټ لپاره نه جبرانېدونکې ضایعه بللې ده.
لیکوال:سعید سمیر
