تاجکستاني رسنیو د دغه هېواد د بېړنیو حالاتو کمېټې له قوله راپور ورکړی چې د تاجکستان د بدخشان د خودمختاره ولایت د مشر، عليشېر ميرزا نبات، مړی د افغانستان پر پوله د پنج سیند څخه موندل شوی دی.
د راپورونو له مخې، د نوموړي موټر د غبرګولي په ۲۷مه د تاجکستان د درواز ولسوالۍ په سیمه کې د پنج سیند ته لوېدلی و. په موټر کې د هغه مېرمن، کم عمره لور، مرستیال او موټرچلوونکی هم سپاره وو.
د معلوماتو له مخې، د عليشېر ميرزا نبات مړی د چنګاښ په ۵مه، د جمعې په ورځ، د پېښې له ځایه شاوخوا ۲۰ کیلومتره ښکته د پنج سیند په بهیر کې وموندل شو.
راپورونه وایي، د نوموړي د مېرمنې، کم عمره لور او مرستیال د موندلو لپاره د لټون عملیات لا هم روان دي. د تاجکستان د کورنیو چارو وزارت ویلي، د پېښې لومړنی لامل د موټر چټک سرعت او د موټرچلوونکي له لوري د کنټرول له لاسه ورکول وو.
د رسنیو د معلوماتو له مخې، موټر له سرحدي انجنیري تاسیساتو او اغزن سیم سره تر ټکر وروسته پنج سیند ته لوېدلی و.
عليشېر ميرزا نبات ۴۵ کلن و او د ۱۴۰۰ لمریز کال د لړم میاشتې راهیسې یې د تاجکستان د بدخشان د خودمختاره ولایت د مشر په توګه دنده ترسره کوله.
لیکوال:سعید سمیر
