په ملګرو ملتونو کې د افغانستان د دایمي استازولۍ سرپرست نصیر احمد فایق د طالبانو لهخوا په هرات کې د بې حجابۍ په پلمه د ښځو نیولو او ځورولو اقدام غندلی دی. فایق وايي چې دا کړنه نه له اسلامي اصولو سره اړخ لګوي او نه هم د افغانستان له کلتور سره سمون لري.
هغه زیاته کړې، د حجاب په پلمه د ښځو نیول د طالبانو د یوې سیستماتیکې پالیسۍ برخه ده چې هدف یې له ټولنې څخه د ښځو حذفول، د هغوی د اساسي ازادیو سلبول او انساني کرامت تر پښو لاندې کول دي. فایق ټینګار کړی، د جامو او ظاهري بڼې له امله د ښځو نیول د دین دفاع نه، بلکې د خلکو د ځپلو، وېرولو او په ټولنه کې د وېرې د فضا د خپرولو وسیله ده.
د افغانستان په هرات کې د ملګرو ملتونو مرستندویه ماموریت (یوناما) هم د طالبانو دغه اقدام غندلی او د بشري حقونو په برخه کې یې جدي اندېښنه څرګنده کړې ده. طالبانو له تېرو څو ورځو راهیسې د هرات ښار په انجیل ولسوالۍ کې د حجاب نه رعایتولو په پلمه پراخ کمپاین پیل کړی او یو شمېر ښځې یې نیولې او له ځان سره وړې دي.
لیکوال:سعید سمیر
