د سایبري امنیت پوهانو خبر ورکړی چې د طالبانو د مالیې وزارت پر وړاندې د سایبري برید پېژندل شوی دی، چې ډېر احتمال لري د پاکستان له خوا یوې هکرې ډلې ترسره کړی وي. دا سایبري ډله چې د «سایډ کاپي» په نوم یادېږي، د مالویر، له لرې واټن څخه د لاسرسي او د جعلي ایمیلونو له لارې چې فایلونه په پښتو ژبه پکې شامل وو، د طالبانو اړوندې ادارې یې په نښه کړي.
د راپور له مخې، دا عملیات د غولوونکو برېښنالیکونو په لېږلو سره پیل کېږي، چې پکې فشرده فایلونه وي او دننه یې یو ویجاړونکی شارټکټ فایل وي چې په پښتو نوم لیکل شوی وي. د پښتو ژبې کارول ښيي چې بریدګر د هدف ادارو له اداري جوړښت او چاپېریال سره بلدتیا لري.
راپورونه زیاتوي چې د دې برید هدف یوازې د مالیې وزارت نه دی، بلکې د ولایتونو مالي او عوایدي ادارې، د دولت لوړپوړي پښتانه چارواکي او سیمهییز کارکوونکي هم پکې شامل دي.
دغه بدافزار داسې وړتیاوې لري لکه د کیبورډ د ټایپ ثبتول، د سکرین عکس اخیستل، د ویبکام او مایکروفون ته لاسرسی، د معلوماتو غلا او له کنټرول سرورونو سره پټ ارتباط جوړول.
همدارنګه دا بدافزار د مایکروسافټ اېج براوزر تقلید کوي او د وینډوز په رجېستري کې پاتې کېږي، چې له امله یې پاکول یې سختېږي.
د سایبري امنیت کارپوهان وايي چې د «سایډ کاپي» ډله د یوې لویې ډلې «ترنسپرنټ ټرایب» یا «اې پي ټي ۳۶» برخه ګڼل کېږي، چې مخکې هم په جنوبي اسیا کې، په ځانګړي ډول هند، پر هدفونو بریدونه کړي دي.
په جلا راپورونو کې ویل شوي چې نږدې وخت کې ورته کمپاین د هند پر پوځي زیربناوو هم پېژندل شوی دی.
په داسې بریدونو کې معمولاً آلوده فایلونه د عادي اسنادو په بڼه یا د پیغام رسولو اپلیکیشنونو لکه واټساپ له لارې لېږل کېږي، او تر اجرا وروسته بدافزار په سیستم کې نصب کېږي او له بریدګر سرور سره اړیکه ټینګوي.
کارپوهان وایي چې په داسې حالت کې بریدګر د عادي کاروونکي په څېر بشپړ لاسرسی ترلاسه کوي، فایلونه کتل او غلا کولای شي، پروګرامونه چلولای شي او د کاروونکي ټول فعالیتونه په بشپړ ډول څارلی شي.
لیکواله:سلیمه آریایي
