ضیاءالله هاشمي، د طالبانو د لوړو زدهکړو وزارت ویاند، وایي چې د طالبانو یو ۱۴ کسیز لوړ پوړی هیئت د نداء محمد ندیم د لوړو زدکړو وزیر په مشرۍ د روسیې د تاتارسټان جمهوریت کازان ښار ته سفر کړی دی.
هغه وایي چې دغه هیئت به د «روسیې او د اسلام نړۍ» په یوولسمه ناسته کې ګډون وکړي، چې د ۲۰۲۶ کال د می له ۱۳مې څخه تر ۱۵مې پورې ترسره کیږي.
په دې هیئت کې د طالبانو د صنعت او سوداګرۍ وزیر نورالدین عزیزي، د مالیې، اقتصاد، کار او ټولنیزو چارو، کانونو او تېلو، عامې روغتیا وزارتونو مرستیالان، او یو شمېر دولتي چارواکي شامل دي. همدارنګه د طالبانو سفیر په مسکو کې او د ځینو اړوندو ادارو رئیسان هم په دې هیئت کې شامل دي.
هاشمي زیاتوي چې د روسیې پلاوي په غوښتنه، د طالبانو او د روسیې فدراسیون تر منځ د ګډ اقتصادي او تجارتي کمیسیون لومړۍ ناسته هم د دې ناستې په څنډه کې ترسره کېږي.
لیکواله:سلیمه حکیمي
