د انټرنېټ څار بنسټ نېټبلاکس راپور ورکړی، چې په ایران کې د انټرنېټ پرې کېدو لړۍ ۶۳مې ورځې ته غځېدلې ده. د دې بنسټ په وینا، دا اوږدمهاله محدودیتونه نه یوازې د هېواد دننه اړیکې اغېزمنې کړې، بلکې بهر مېشتو ایرانیانو ته یې هم جدي ستونزې رامنځته کړې دي.
نېټبلاکس زیاتوي، چې د انټرنېټ د دوامدارې قطع کېدو له امله ډېری ایرانیان نهشي کولای د خپلو کورنیو او دوستانو د امنیت، روغتیا او عمومي وضعیت په اړه معلومات ترلاسه کړي. دا وضعیت د اندېښنو د زیاتېدو لامل شوی او د بشري اړیکو پر عادي بهیر یې منفي اغېزې کړي دي.
کارپوهان خبرداری ورکوي، چې دا ډول پراخ او اوږدمهاله محدودیتونه کولای شي اقتصادي فعالیتونه، د معلوماتو ازاد جریان او د خلکو ورځنی ژوند له جدي خنډونو سره مخ کړي.
لیکوال:سعید سمیر
