طالبانو اعلان کړی چې د پنجشېر ولایت له کانونو څخه استخراج شوي ۳ زره او ۲۰۸ قیراطه زمرد پلورل شوي دي.
د طالبانو تر کنټرول لاندې باختر آژانس د سېشنبې په ورځ، د غبرګولي ۲۶مه، راپور ورکړی چې دا اندازه زمرد کورنیو سوداګرو ته پلورل شوي دي.
د راپور له مخې، د پنجشېر ولایت لپاره د طالبانو د والي ویاند سیفالدین لټون ویلي چې دا اندازه زمرد د ۱۳۹ زره او ۴۰۰ امریکایي ډالرو په بدل کې پلورل شوي دي.
دا په داسې حال کې ده چې څو ورځې وړاندې هم طالبانو د پنجشېر له کانونو څخه د استخراج شويو نږدې ۱۲ زره قیراطو زمرد د پلور خبر ورکړی و.
طالبانو د افغانستان د بیا نیولو وروسته څو ځله د دې ولایت د قیمتي ډبرو، په ځانګړي ډول زمردو، د پلور خبرونه ورکړي دي.
لیکواله:سلیمه آریایي
