درې افغان ښځې د بریټانیا سیمه ییزو شوراوو په ټاکنو کې بریالۍ شوي دي. رابعه نسیمي، شهیره کریمي او پیمانه اسد، د کارګر ګوند غړې، د لندن ښار په بېلابېلو سیمو کې د ځایي شوراوو ټاکنو کې بریالۍ شوي او دغو شوراوو ته یې لار موندلې ده.
رابعه نسیمي د لندن د لویدیځ محلي شورا ټاکنو کې له ۱۲۰۰ څخه زیاتو رایو سره د درې بریالیو کاندیدانو له ډلې وټاکل شوه. هغې د طالبانو د لومړي پړاو واکمنۍ پر مهال، کله چې یوازې ۵ کلنه وه، له خپلې کورنۍ سره افغانستان پرېښود او بریټانیا ته مهاجره شوه.
آغلې نسیمي د ټاکنو د پایلو د اعلان وروسته په ټولنیزه شبکه اکس کې ولیکل چې د کارګر ګوند د ایسټ اکټن سیمې د شورا غړې په توګه ټاکل کېدل یې ویاړ ګڼي. هغې دغه انتخاباتي سیالۍ اوږده او ستونزمنه وبلله.
رابعه نسیمي په ۱۹۹۹ کال کې بریټانیا ته راغله. هغې د لندن د ګولډسمیتس پوهنتون څخه د ټولنپوهنې په برخه کې لیسانس ترلاسه کړ او بیا یې د لندن د اقتصاد او سیاسي علومو په پوهنځي کې خپله ماسټري بشپړه کړه. اوس هغه په کمبريج پوهنتون کې د ډکټورا څانګه کې د دوهم نسل مهاجرینو، هویت، هېواد او ژبې په اړه څېړنه کوي.
پیمانه اسد هم له هغو رایه ورکونکو مننه وکړه چې ورباندې یې د دریم ځل لپاره باور کړی دی. هغې په یوه پیغام کې ولیکل چې د ټاکنو په لړ کې له لفظي بریدونو، تورونو او بېلابېلو ګواښونو سره مخ وه.
آغلې اسد وویل ځینې خلک د هغې د سیاسي لیدلورو له امله پر هغې نیوکې کولې او حتی د خاموشۍ لپاره یې د وژنې ګواښ کړی و. هغې ټینګار وکړ چې د دې فشارونو سریېره هم و توانېده چې د درېیم ځل لپاره په ټاکنو کې بریالۍ شي او تر ټولو زیاتې رایې هم ترلاسه کړي.
د بریټانیا د سیمه ییزو ټاکنو پایلې ښيي چې د کارګر ګوند،د کییر ستارمر په مشرۍ، په انګلستان کې د سیمه ییزو.شوراوو او همدارنګه په سکاټلند او ویلز کې د ملاتړ رایو په شمېر کې له کمښت سره مخ شوی دی.
په مقابل کې، د ریفورم یویکي ګوند، د سکاټلند ملي ګوند، پلاید کامری په ویلز کې او شین ګوند وتوانېدل په ځینو سیمو کې پرمختګ وکړي او زیاتې څوکۍ ترلاسه کړي.
دغه ټاکنې د انګلستان د ۱۳۶ محلي شوراوو او د سکاټلند او ویلز د سیمه ییزو پارلمانونو لپاره ترسره شوې او د کارګر ګوند د حکومت لپاره د ۲۰۲۹ کال د عمومي ټاکنو څخه مخکې د عامه نظر له مهمو ازموینو څخه ګڼل کېږي.
لیکواله:سلیمه آریایی
