د امریکا ولسمشر ډونالډ ټرمپ په یوه پاډکاسټ مرکه کې، د واشنګټن او اسلامي جمهوریت ترمنځ د اوربند د تمدید په اړه د روانو خبرو اترو ته په اشاره وویل چې مجتبی خامنهای په دې خبرو کې رول لري او د پرېکړو وروستۍ تایید ورسره وي.
ټرمپ وویل: «وايي چې مجتبی خامنهای له متحده ایالاتو سره د خبرو اترو په اړه وروستی تایید ورکوي.» هغه همدارنګه زیاته کړه چې امکان لري په یوه وخت کې له مجتبی خامنهای سره لیدنه وکړي.
د امریکا ولسمشر په دوام کې وویل چې اسلامي جمهوریت منلې ده چې اټومي وسله به ونه لري. هغه د ایران وضعیت «په چټک بدلون کې» وباله او زیاته یې کړه چې شرایط به «ډېر ښه وي.»
ټرمپ همدارنګه ادعا کړې چې د مجتبی خامنهای رول د مذاکراتو په پرېکړو کې نوی نه دی او دا بهیر له اوږدې مودې راهیسې روان دی.
هغه په خپلو خبرو کې وویل: «دا له ډېرې مودې راهیسې همداسې ده. لومړی د هغه پلار او بیا خپله هغه، خو داسې ښکاري چې موږ له یو بل سره ښه اړیکه لرو.»
دا څرګندونې په داسې حال کې کېږي چې تر اوسه د مذاکراتو د بهیر او د بېلابېلو کسانو د رول په اړه رسمي او بشپړ جزئیات د اړخونو له خوا نه دي خپاره شوي.
لیکواله:سلیمه آریایي
