د لغمان ولایت په قرغیو ولسوالۍ کې د ۱۶۲ میلیونه افغانیو په پانګونه د وریجو د پروسس او بستهبندۍ د یوې نوې کارخونې د جوړېدو چارې پیل شوې.
د طالبانو د لغمان د صنعت او سوداګرۍ ریاست ویلي، دغه کارخونه د چهار باغ په سیمه کې جوړیږي او ټاکل شوې ده چې د راتلونکو دوو میاشتو په موده کې بشپړه شي.
د یاد ریاست د معلوماتو له مخې، په دې کارخونه کې به شاوخوا ۱۰۰ کسانو ته مستقیم او له ۴۰۰ تر ۶۰۰ کسانو پورې په غیر مستقیم ډول د کار زمینه برابره شي.
د کارخونې د مالک حاجي سلیم په وینا، دا فابریکه به په ۲۴ ساعتونو کې ۴۰ زره کیلوګرامه وریجې پروسس کړي. هغه زیاته کړه چې د لغمان ترڅنګ به د ننګرهار، بغلان او کندوز ولایتونو وریجې هم په همدې کارخونه کې پروسس او بستهبندي کېږي، او وروسته به د ننګرهار، کونړ، نورستان، کابل، پکتیا او خوست بازارونو ته ولېږدول شي.
دا پروژه په داسې حال کې پیلېږي چې د افغانستان صنعتګر لا هم د مناسبې صنعتي ځمکې او برېښنا د کمښت له ستونزو شکایت کوي او وایي، د دغو ستونزو د حل لپاره شوې ژمنې تر اوسه په عملي توګه نه دي پوره شوي.
لیکوال:سعید سمیر
