د هرات له حوزوي روغتون څخه غلو ۲ میلیونه او ۳۰۰ زره افغانۍ غلا کړي دي.
سرچینې وايي، د شنبې په سهار د روغتون کارکوونکي هغه مهال له غلا خبر شول چې د اداري او محاسبې دفترونو د امنیتي کامرو هارډډیسکونه ایستل شوي وو.
د لومړنیو څېړنو له مخې، غلو د روغتون د اداري مدیر او د محاسبې مدیر دفترونه جلا جلا پرانیستي او د دواړو دفترونو د امنیتي کامرو هارډډیسکونه یې له ځان سره وړي دي.
د سرچینو په وینا، غلو وروسته سیف په کیلي پرانیستی او له هغه څخه یې پیسې ایستلې دي. د سیف د ماتولو نښې نه دي لیدل شوي.
یوه سرچینه وايي، غلا شوې پیسې د روغتون د فیسونو او عوایدو له لارې راټولې شوې وې.
د غلا له کشف وروسته د طالبانو کسان روغتون ته ورغلي او د محاسبې د نغدو پیسو د برخې نږدې ټول کارکوونکي او د دې برخې خدمتګاران یې له ځان سره استخباراتو ته وړي دي.
لیکوال:سعید سمیر
