په افغانستان کې د تېر نظام د بهرنیو چارو پخواني وزیر محمد حنیف اتمر د روږدو د درملنې پر مرکز د پاکستان د برید په تړاو د ریچارډ بېنېټ دریځ ستایلی او د جرمونو له نړیوالې محکمې څخه یې غوښتي، چې د جګړهییزو جرمونو د تورنو کسانو پر ضد د دعوې د ثبت او محاکمې لپاره عملي اقدامات وکړي.
اتمر ویلي، د جرمونو نړیوالې محکمې څارنوال باید په مستقیم ډول د جرمونو د اعلان، د دعوې د اقامې او د تورنو کسانو د محاکمې بهیر پرمخ یوسي. د هغه په وینا، د یوناما، د بشري حقونو د بنسټونو او د رسنیو راپورونه او مستندونه د عدالت د تامین او حقوقي دعوو لپاره مهم بنسټ جوړوي.
تر دې مخکې، د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ په کابل کې د روږدو کسانو د درملنې پر روغتون د پاکستان وروستي خونړي برید ته په اشارې سره د دې پېښې د بشپړې او خپلواکې څېړنې غوښتنه کړې ده.
لیکوال:سعید سمیر
