د طالبانو د بادغیس ولایت د کرنې، اوبو لګولو او مالدارۍ ریاست اعلان کړی چې سږ کال په دغه ولایت کې د پستې حاصلات د اقلیمي بدلونونو او د حشراتو د بریدونو له امله شاوخوا ۵۰ سلنه کم شوي دي.
د دغه ریاست د نشراتو مسؤل عبدالحلیم حلیمزاد ویلي چې اقلیمي بدلونونه او د زیان رسوونکو حشراتو پراخېدل د بادغیس د پستې د حاصلاتو د کمېدو له مهمو لاملونو څخه دي.
د هغه په وینا، پسته د دې ولایت د خلکو د عاید له مهمو سرچینو څخه ده او د حاصلاتو کمښت به باغ لرونکو او سوداګرو ته د پام وړ مالي زیانونه ورسوي.
د بادغیس طبیعي پستې ځنګلونه په افغانستان کې د دې محصول له مهمو سیمو څخه شمېرل کېږي او د زرګونو کورنیو ژوند له همدې محصول سره تړلی دی.
تېر کال هم یو شمېر صادرونکو خبرداری ورکړی و چې د پستې له بشپړې پخېدو مخکې د هغې وختي ټولول د طبیعي پستې ځنګلونو بقا له ګواښ سره مخ کوي. که دا لړۍ دوام وکړي، نو په راتلونکو کلونو کې به د پستې حاصلات نور هم کم شي.
لیکواله:سلیمه آریایي
