د ملګرو ملتونو د پراختیا پروګرام اعلان کړی چې د دغه بنسټ د ماین پاکۍ یوې ډلې په بغلان کې ۲۵ دانې ناچاودېدلي توپچي مرمۍ، چې د یوه استوګنیز کور په انګړ کې موندل شوې وې، په خوندي ډول شنډې کړي دي. د دغه بنسټ په وینا، دې عملیاتو د یوې مرګونې پېښې مخه نیولې د ملګرو ملتونو د پراختیا پروګرام د سې شنبې په ورځ، د چنګاښ ۲۳مه، په یوه راپور کې ویلي چې دغه ۱۲۲ مليمتري توپچي مرمۍ د بغلان ولایت د بغلان مرکزي ولسوالۍ د غلامبای له کلي څخه موندل شوي او په خوندي توګه له منځه وړل شوي دي.
د راپور له مخې، دغه مهمات هغه مهال وموندل شول چې د سیمې اوسېدونکي د یوه استوګنیز کور د نړېدلې برخې د بیا رغولو په حال کې وو. د ځمکې د کیندلو پر مهال د یوه کارګر کلنګ له یوه کلک شي سره ولګېد. کله یې چې خاوره لرې شوه، څرګنده شوه چې هلته یوه ناچاودېدلې توپچي مرمۍ پرته ده.
وروسته له هغې چې سیمهییز پولیس خبر شول، د ملګرو ملتونو د پراختیا پروګرام د ماین پاکۍ ډله سیمې ته ولېږل شوه. دغې ډلې د سیمې له ارزونې وروسته په ټولیز ډول ۲۵ توپچي مرمۍ وموندلې او شنډې یې کړې.
د ماین پاکۍ کارپوهانو ویلي چې دا مهمات ښايي د ۱۹۸۰مو کلونو په لسیزه کې د افغانستان د شوروي اتحاد د اشغال له دورې څخه پاتې شوي وي.
د ملګرو ملتونو د پراختیا پروګرام ویلي چې د دې عملیاتو په ترسره کېدو سره د ۸ کارګرانو او د یوې کورنۍ د ۱۶ غړو ژوند د احتمالي چاودنې او مرګ له خطر څخه وژغورل شو.
افغانستان د څو لسیزو جګړو له امله لا هم د نړۍ له هغو هېوادونو څخه دی چې د ماینونو او ناچاودېدونکو مهماتو له پلوه تر ټولو ککړ بلل کېږي. د دغو چاودېدونکو توکو شتون هر کال د سلګونو کسانو د مړینې یا ټپي کېدو لامل کېږي.
د ماین پاکۍ په برخه کې فعال بنسټونه وايي چې په افغانستان کې په منځنۍ توګه هره میاشت له ۴۰ تر ۵۰ کسان او هر کال له ۶۰۰ تر ۷۰۰ کسان د ماینونو او نورو ناچاودېدونکو مهماتو د چاودنو له امله وژل کېږي یا ټپیانېږي. د دغو بنسټونو د شمېرو له مخې، له ۷۰ سلنې ډېر قربانیان ماشومان جوړوي.
لیکواله:سلیمه آریایي
